Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 109 Hüküm no: 68 Orijinal metin no: [6a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İva bt. Anastaş’ın kiraladığı küçük kızı Karim’in ücretini vermediği iddiasıyla Anna bt. Gapril aleyhine açtığı alacak davasında iddiasını ispat edemediği Galata hâricinde Hüseyin Ağa Mahallesi’nde mütemekkine mu‘arrefetü’ş-şahs İva bt. Anastaş nâm Nasrâniye Galata Bâb Mahkemesi’nde meclis-i şer‘de kezâlik şahsı mu‘arrefe Anna bt. Gapril nâm Nasrâniye muvâcehesinde ben işbu hâzıra bi’l-meclis sadriye sagīre kızım Karim’i beher şehr dörder guruş ücret tesmiyesiyle menzilinde hizmet etmek üzere mersûme Anna Nasrâniyye’ye bi’l-velâye îcâr ol dahi ba‘de’l-istîcâr müddet-i mezkûrede eylediği hizmetinin ücret-i müsemmâsı olan yüz kırk dört guruş sagīre-i mersûme için bana vermeyip zimmetinde kalmağla hâlâ bi’l-velâye taleb ederim deyü da‘vâ ettikde ol dahi cevâbında işbu yedimde olup bin iki yüz on yedi senesi Zi’l-hiccetü’ş-şerîfe’nin ikinci günü tarihiyle müverraha mahkeme-i mezbûrede hilâfeten müvellâ olan müderrisîn-i kirâmdan Şeyhzâde Mehmed Selim Evliyâ Efendi’nin mümzâ ve mahtûm [i‘tâ eylediği] bir kıt‘a hüccet-i şer‘iyye mantûkunca mersûme İva Nasrâniye sagīre-i mersûmeyi menzilinde hizmet etmek üzere beher şehr dörder guruş ücret tesmiyesiyle bana îcâr ve ücret-i müsemmâ-yı merkūmeyi sagīre-i mersûmenin nafaka ve kisve ve sâir levâzım-ı zarûriyyesine harc u sarf etmişidim deyü hüccet-i mezkûreyi ibrâzıyla eylediği def‘ini ve mazmûn-ı hüccet-i mezkûreyi mersûme İva Nasrâniye mukırre ve mu‘terife olmağın mûcebince müdde‘iye-i mersûme İva Nasrâniye da‘vâ-yı mezkûresiyle mersûme Anna Nasrâniye’ye bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 16 Safer [sene 1221.]