Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 111 Hüküm no: 71 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Biricik bt. Agop’un kendisinden riba olarak aldığı parayı iade etmesi talebiyle Aksabet bt. Artin aleyhinde açtığı davada iddiasını ispat edemeyip davalıya ikrarı üzere yüz guruş ödemesi gerektiği Sâhib-i arzuhâl mu‘arrefetü’ş-şahs Biricik bt. Agop Nasrâniye Galata Bâb Mahkemesi’nde meclis-i şer‘de derûn-ı arzuhâlde mersûmetü’l-ism mu‘arrefetü’ş-şahs Aksabet bt. Artin Nasrâniye muvâcehesinde ben bundan akdem Nasrâniye-i mersûme yedinden ve vasîsi olduğu oğlu hâzır bi’l-meclis Makar’ın mâlından iktirâz ve kabz eylediğim bâ-temessük yüz elli guruşun elli guruşunu kendiye ba‘de’l-edâ bâkī zimmetimde kalan yüz guruş mukābelesinde dâyinem mersûme bilâ-devr ribâ nâmıyla mâlımdan ceste ceste iki yüz otuz yedi buçuk guruşumu ahz etmekle me’hûzu olan meblağ-ı merkūm iki yüz otuz yedi buçuk guruşun yüz guruşu deyn-i merkūma takāsan ba‘de’t-tenzîl bâkīsi olan yüz otuz yedi buçuk guruş istirdâd ederim deyü ba‘de’d-da‘vâ ve’s-suâl ol dahi cevâbında ber-vech-i muharrer yüz elli guruşdan bâkī yüz guruş ikrârında Nasrâniye-i mersûmeyi tasdîk ve ziyâde müdde‘âsını ba‘de’l-inkâr müdde‘iye-i mersûme Biricik Nasrâniye ber-vech-i muharrer ribâ müdde‘âsına ikāmet-i beyyine edemeyip bi’t-taleb mersûme Aksabet Nasrâniye ba‘de’t-tahlîfü’ş-şer‘î mûcebince müdde‘iye-i mersûme Biricik Nasrâniye meblağ-ı merkūm mütâlebesiyle mersûme Aksabet Nasrâniye’ye bilâ-beyyine mu‘ârazadan ba‘de’l-men‘ ikrârı mûcebince meblağ-ı merkūm yüz guruşu mersûme Aksabet Nasrâniye’ye edâ ve teslîme mersûme Biricik Nasrâniye’ye bi’t-taleb tenbîh olunduğu İbrahim Çavuş kulları yediyle huzûr-ı âlîlerine i‘lâm olundu. Fî 19 Safer sene [1]221.