Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 116 Hüküm no: 81 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kulaksız Ahmed Mahallesi Avârız Vakfı’nın câbi ve kâtibi olup bunamış olan Seyyid Mustafa’nın birikmiş olan alacağının vakıf tarafından vasisine ödenmesine karar verildiği Havâss-ı refi‘a kazâsı mahallâtından Davud Ağa Mahallesi’nde sâkin olup bu esnâda bi-kazâillâhi te‘âlâ muhtellü’d-dimâğ olan hâssa hasekilerinden es-Seyyid Mustafa b. Ahmed nâm mecnûn nezâret-i dâ‘îlerinde olan evkāfdan mahrûse-i Galata muzâfâtından Kasımpaşa’da kâin Kulaksız Ahmed Mahallesi’nin avârız vakfının yevmî ( ) akçe vazîfe kitâbet ve yevmî bir akçe vazîfe ile cibâyet cihetlerine bâ-berât-ı âlî mutasarrıf olduğu hâmiş-i arzuhâlde mastûr der-kenâr mefhûmundan zâhir olmağla mecnûn-ı mezbûrun vazîfe-i mezkûresinden târih-i i‘lâm gelince üç senede müctemi‘ 18 guruş taraf-ı vakıfda alacağı olduğu mecnûn-ı mezbûrun kâinvâlidesi ve bâ-hüccet kıbel-i şer‘den mansûbe vasîsi zâtı mu‘arrefe Şerîf Halime bt. el-Hâc Ahmed nâm hatun Çarşamba günü Dîvân-ı âlîlerinde ba‘dehû Galata Mahkemesi’nde ma‘kūd meclis-i şer‘de vakf-ı mezbûr mütevellîsi es-Seyyid Mustafa Çelebi b. es-Seyyid Mehmed ile lede’l-murâfa‘a ve’l-muhâsama atîk defter-i muhâsebe kaydlarından ve erbâb-ı vukūf ihbârından bâhir ve müstebân oldukdan sonra mütevellî-i mezbûr mecnûn-ı merkūmun vazîfe-i mezkûresini mâl-ı vakf-ı mezbûrdan tamamen vermeğe ve vasiyy-i merkūme dahi mecnûn-ı mezbûrun hâl-i ifâkatine değin bir mütedeyyin kimesneyi tarafından vekîl nasb ile hizmet-i lâzımesini kemâ-yenbeğī edâya herbiri müte‘ahhidler olup bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 19 S sene [1]221.