Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 116 Hüküm no: 82 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Seyyid Mustafa’nın tütün bedelinden üç yüz yirmi altı buçuk guruş alacağını taksitle ödemesi için Tütüncü Mardros v. Minas’a izin verdiği Tüccârdan es-Seyyid Mustafa b. Osman Galata Bâb Mahkemesi’nde meclis-i şer‘de Tütüncü Mardros v. Minas zimmî muvâcehesinde mersûm Mardros zimmî zimmetinde ma‘lûmü’l-vezn duhân semeninden üç yüz yirmi altı buçuk guruş alacağım olup lâkin medyûnum mersûm meblağ-ı mezkûru hâlâ ve def‘aten edâya iktidârım yokdur deyü ber-vech-i câ’î te’cîl ve taksîte tâlib olmağla ben dahi beher mâh seksener guruş verip târih-i i‘lâmdan dört ay beş gün tamamına değin tamamen edâ etmek üzere mersûmu te’cîl ve taksît eylediğimde ol dahi müeccelen ve mukassatan edâ-yı deyne ta‘ahhüd eyledi deyü mukırr-ı dâyin-i mezbûru bi’l-cümle kelimât-ı meşrûhasında medyûn-ı mersûm Mardros zimmî tasdîk eylediği huzûr-ı âlîlerine i‘lâm olundu. Fî 21 Safer sene [1]221.