Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 820 Hüküm no: 1070 Orijinal metin no: [128a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yedikule meyhanecilerinin tersaneye kürekçi teminiyle ilgili vergileri dışında tekâlif için Havâss-ı Refîa meyhanecilerinin kendilerine müdahalesinin önlenmesi Mahmiye-i İstanbul hısnı ebvâbından Yedikule hâricinde vâki‘ meyhânelerde meyhâneci olan Yorgi v. Mavrovi ve Dimitri v. Panayot ve Kristo v. Yani ve İlya v. Kesteri ve Yani v. Kiryaki ve Panayot v. Andriye ve Yani v. Penho ve Dimo v. ( ) ve Hristo v. Rali ve Mihal v. Yorgi ve Apostol v. Papadimo ve Panayot v. Petro nâm zimmîler meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda her biri ikrâr ve takrîr-i kelâm ve ta‘bîr ani’l-merâm edip kadîmü’l-eyyâmdan meyhâneci tâifesi üzerlerine taraf-ı saltanat-ı aliyyeden ba‘zı tekâlîf nâzil oldukda biz tekâlîfimizi mahmiye-i mezbûrda olan meyhâneciler ile ma‘an veregelip Havâss-ı Refî‘a tevâbi‘inde olan meyhâneciler aslâ bize müdâhale edegelmediklerinden mâ‘adâ yedimizde olan emr-i şerîf-i cihân-mutâ‘-ı lâzımü’l-ittibâ‘da tasrîh olunduğu üzre senede Tersâne-i âmireye verdiğimiz on nefer kürekçiyi verip kusûrumuz olmadıkdan sâir tekâlîf talebi ile rencîde olunmak lâzım gelmez iken hâlâ Havâss-ı Refî‘a tevâbi‘inde olan meyhâneciler kürekçiden gayrı tekâlîfi bizim ile verin deyû bizi rencîdeden hâlî değillerdir taraf-ı şer‘-i şerîfden mahalline varılıp hakīkat-i hâl bî-garaz müslimînden istihbâr olunup haberleri tahrîr olundukdan sonra yedimize hüccet verilmek matlûbumuzdur deyip vech-i meşrûh üzre fermân-ı âlî dahi sâdır olmağın cânib-i şer‘-i enverden mevlânâ es-Seyyid Süleyman Efendi b. es-Seyyid Ali irsâl olunup ol dahi husûs-ı mezbûr için mübâşir ta‘yîn olunan Cafer Ağa b. Pîrî ve Mustafa Çavuş b. Yahya ile zikr olunan Yedikule hâricine varıp zeyl-i kitâbda muharrerü’l-esâmî olan müslimîn mahzarlarında akd-i meclis-i şer‘-i mübîn edip husûs-ı mezbûru müslimîn-i mezkûrînden istihbâr ettiğinde her biri kadîmü’l-eyyâmdan meyhâneci tâifesi üzerlerine taraf-ı saltanat-ı aliyyeden tekâlîf nâzile oldukda zikr olunan kapıdan taşra çıkıldıkda Küçük Çekmece’ye giden yolun deryâ tarafında olan meyhânelerin meyhânecileri tekâlîflerini İstanbul’da olan meyhâneciler ile ma‘an veregelip aslâ Havâss-ı Refî‘a tevâbi‘inde olan meyhâneciler müdâhale etmezler idi deyû her biri alâ tarîki’ş-şehâde haber verdiklerini mevlânâ-yı mezbûr mahallinde tahrîr ba‘dehû ma‘an irsâl olunan İbrahim Çelebi b. Ahmed ve mezbûrân Cafer Ağa b. ( ) ve Mustafa Çavuş ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mahmud Efendi [b.] Mehmed el-İmâm, Mehmed Halîfe b. Himmet el-Müezzin, Mehmed Ağa b. el-Hâc Bayram, el-Hâc Sâlih b. Mustafa, el-Hâc Mehmed b. Abdülkādir, el-Hâc Abdülcelil b. el-Hâc Ahmed, İbrahim Çelebi b. Ramazan, Mustafa b. Çalabverdi, İsmail b. Musa, Mehmed Halîfe b. Hüseyin, Hüseyin b. Mehmed, Mehmed b. Hüsameddin, Mehmed b. Ahmed, Pîrî b. Himmet, Ahmed b. Habib, Musli b. Murad, İbrahim b. Abdülfettâh, Mustafa Çelebi b. Mahmud, Ramazan Halîfe b. ( ) el-Müezzin, Mehmed Çelebi b. el-Hâc Musa, Hasan Çelebi b. Yusuf, Ali Çelebi b. Mehmed, umdetü’n-nüvvâb ve’l-müteşerri‘în Emin Efendi Nâib-i Mahkeme-i Medîne-i Ebî Eyyûb-i Ensârî.