Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 821 Hüküm no: 1071 Orijinal metin no: [128b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Perizat bt. Abdullah’ın, Ahmed ve İvaz Giray’ın anneleri Gevherhan’ın âzatlı câriyesi olduğundan terekesinin bunlara verilmesi Vilâyet-i Rumeli’nde Yanbolu kazâsına tâbi‘ Abdullahköyü nâm karye sükkânından Ahmed Giray ve İvaz Giray ibney merhûm Mehmed Giray nâm sultanların taraflarından husûs-ı âti’l-beyâna vekâlet iddi‘â eden râfi‘ü’l-kitâb Mustafa Bey b. Halil nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bi’l-fi‘l şıkk-ı evvel defterdârı kāimmakāmı olup mahmiye-i İstanbul’da Keçeci mahallesinde sâkin iken bundan akdem vefât eden Perizat bt. Abdullah nâm hâtunun vârisi olmamak zu‘mu ile beytülmâl için terekesine vâzı‘ü’l-yed olan emîrü’l-ümerâ’i’l-kirâm Mehmed Paşa mahzarında üzerine da‘vâ ve takrîr-i kelâm edip mûmâ-ileyhimâ Ahmed Giray ve İvaz Giray’ın babaları merhûm-ı mezbûrun müteveffât vâlidesi Gevherhan Nesîme nâm hâtunun müteveffât-ı mezbûre Perizat câriye mu‘tekâsı olup verâseti usûbet-i sebebiye cihetinden mûmâ-ileyhimâ Ahmed Giray ve İvaz Giray’a münhasıra ve mûmâ-ileyhimâ Ahmed Giray ve İvaz Giray müteveffât-ı mezbûre Perizat’ın terekesini vâzı‘ü’l-yed olanlardan ahz u kabza ve kendilere îsâle ve kabz ve îsâl mütevakkıf olduğu umûrun küllîsine taraflarından beni vekîl ve menâblarına nâib nasb etmekle suâl olunup müteveffât-ı mezbûre Perizat’ın terekesini bana teslîme müşârün-ileyh Mehmed Paşa’ya tenbîh olunmak matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda karye-i mezbûre ahâlîsinden Abdurrahman b. Ramazan ve Yusuf b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mûmâ-ileyhimâ Ahmed Giray ve İvaz Giray babaları merhûm-ı mezbûr Mehmed Giray’ın müteveffât vâlidesi Gevherhan Nesîme nâm hâtunun müteveffât-ı mezbûre Perizat câriye-i mu‘tekâsı olup verâseti usûbet-i sebebiye cihetinden mûmâ-ileyhimâ Ahmed Giray ve İvaz Giray’a münhasıradır gayrı vârisi ve terekesine âhar müstahıkkı olduğu ma‘lûmumuz değildir, mûmâ-ileyhimâ Ahmed Giray ve İvaz Giray müteveffât-ı mezbûre Perizat’ın terekesini vâzı‘ü’l-yed olanlardan taleb ve ahz u kabza ve kendilerine îsâle ve kabz ve îsâl mütevakkıf olduğu umûrun küllîsine taraflarından bizim huzûrumuzda müdde‘î-i mezbûru vekîl ve menâblarına nâib nasb ve ta‘yîn eylediler, bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup mûcebince mûmâ-ileyhimâ Ahmed Giray ve İvaz Giray’ın vech-i muharrer üzre verâsetlerine ve müdde‘î-i mezbûrun vekâletine hükm olundukdan sonra mezbûre Perizat’ın terekesini müdde‘î-i mezbûra teslîme müşârün-ileyh Mehmed Paşa’ya tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Umdetü erbâbi’t-tahrîr ve’l-kalem Ebûbekir Efendi Tezkireci-i evvel, zahrü erbâbi’t-tahrîr ve’r-rakam Mustafa Efendi Tezkireci-i sânî, zahrü’l-emsâl İsmail Ağa Serçavuşân, Eyüb Ağa.