Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 128 Hüküm no: 107 Orijinal metin no: [9a-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Hüseyin’in Panos v. Asvador’daki alacağına kefaletinden dolayı kardeşi Berber Toma’dan beş yüz guruş alacağı olduğu Mehmed Ağa b. Hüseyin nâm kimesne Galata Bâb Mahkemesi’nde meclis-i şer‘-i kavîmde Galata’da mütemekkin Berber Toma v. Asvador nâm zimmî muvâcehesinde mersûm Toma zimmînin li-ebeveyn er karındaşı gāib ani’l-meclis Panos nâm zimmî zimmetinde Ermeniyyü’l-ibâre bir kıt‘a deyn temessükü mantûkunca cihet-i karzdan alacak hakkım olan beş yüz guruşa karındaşı mersûm Toma zimmî bi’l-emr ve’l-kabûl kefîl ve zâmin olmağla bi-hükmi’l-kefâle meblağ-ı mezkûr beş yüz guruşu mersûm Toma zimmetinden [zimmîden] taleb ederim deyü da‘vâ ettikde ol dahi cevâbında husûs-ı mezkûru bi-tamâmihî tâyi‘an ve kat‘iyyen ikrâr u i‘tirâf etmeğin alâ-mûcibi ikrârihi meblağ-ı mezkûr beş yüz guruşu târih-i i‘lâmdan otuz bir gün mürûrunda müdde‘î-i mezbûr Mehmed Ağa’ya bi-hükmi’l-kefâle edâ ve teslîme ta‘ahhüd eyledikde müdde‘î-i mezbûr Mehmed Ağa dahi râzı olduğu bi’[l]-iltimâs huzûr-ı âlîlerine i‘lâm olundu. Fî 6 Rebî‘ülevvel sene [1]221.