Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 134 Hüküm no: 115 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Ahmed Beşe’nin sattığı at bedelinden alacağı olduğu iddiasıyla Bakkāl Angeli aleyhine açtığı davada iddiasını ispat edemediği Yağcı esnâfından Ahmed Beşe b. Memiş Galata’da mahfil-i kazâda Bakkāl Angeli v. Ademi zimmî muvâcehesinde târih-i i‘lâmdan on beş gün mukaddem yedimden iştirâ ve kabz eylediği bir re’s bârgir semeninden yüz elli guruş alacağım olmağla hâlâ taleb ederim deyü da‘vâ eyledikde ol dahi cevâbında ber-vech-i muharrer ikrâr lâkin târih-i mezkûrdan bir gün mürûrunda müdde‘î-i mezbûr Ahmed Beşe ile mebî‘-i mezkûru beynimizde bi’t-terâzî fesh ve ikāle ve mebî‘-i mezkûru kendiye teslîm ol dahi ba‘de’t-tesellüm hattâ târih-i i‘lâmdan üç gün mukaddem âhara bey‘ sadedinde iken zikrolunan bârgir yedinde helâk olmuş idi deyü eylediği def‘ini mezbûr Ahmed Beşe mukırr u mu‘terif olmağın mûcebince müdde‘î-i mezbûr Ahmed Beşe da‘vâ-yı mezkûresiyle mersûm Angeli zimmîye bî-vech-i şer‘î mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 6 Rebî‘ülevvel sene [1]221.