Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 144 Hüküm no: 136 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fesci Seyyid Kasım’ın fes ve Mağrib şalı bedelinden Ahmed Reis’den kırk altı buçuk guruş alacağı olduğu Fesci es-Seyyid Kasım b. es-Seyyid Mehmed nâm kimesne Galata Bâb Mahkemesi’nde meclis-i şer‘de sefîne reislerinden Ahmed Reis b. el-Hâc İsmail nâm kimesne muvâcehesinde mezbûr Ahmed Reis zimmetinde ma‘lûmü’l-aded fes ve Mağrib şâlî semenlerinden kırk altı buçuk guruş alacak hakkım olmağla hâlâ taleb ederim deyü da‘vâ ettikde ol dahi cevâbında müdde‘î-i mezbûra fes ve şal semenlerinden ancak otuz buçuk guruş el-yevm zimmetinde deyni olduğunu ikrâr, ziyâde on altı guruşu [lede]’t-tezkiye ba‘de’l-inkâr müdde‘î-i mezbûr es-Seyyid Kasım ber-vech-i muharrer ziyâde-i mezkûre müdde‘âsını makbûlü’ş-şehâde idükleri ihbâr olunan Mehmed b. Kasım ve el-Hâc Abdullah b. el-Hâc Mehmed nâm kimesneler şehâdetleriyle mezbûr Ahmed Reis muvâcehesinde vech-i şer‘î üzere isbât etmeğin mûcebince meblağ-ı mezkûr kırk altı buçuk guruşu müdde‘î-i mezbûr es-Seyyid Kasım’a edâ ve teslîme mezbûr Ahmed Reis’e tenbîh olunduğu huzûr-ı âlîlerine i‘lâm olundu. Fî 25 Ra sene [1]221.