Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 148 Hüküm no: 146 Orijinal metin no: [13a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü A‘mâ Hıristo’nun verdiği karzdan Sofya bt. Yorgi’den kırk sekiz guruş alacağı olduğu Kürkçü A‘mâ Hıristo v. Todori nâm [zimmî] Galata Bâb Mahkemesi’nde meclis-i şer‘de Galata’da Sultan Bayezid Mahallesi’nde mütemekkine mu‘arrefetü’ş-şahs Sofya bt. Yorgi nâm Nasrâniye muvâcehesinde mersûme Sofya Nasrâniye zimmetinde cihet-i karzdan yüz guruşdan bâkī kırk sekiz guruş alacak hakkım olmağla hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin meblağ-ı bâkī-i mezkûr kırk sekiz guruşu müdde‘î-i mersûm zimmetinde menzil icâresinden alacağım olan kırk sekiz guruşa takās ve mahsûb etmişidim deyü ba‘de’d-def‘ ve’l-inkâr dâfi‘a-i Nasrâniye-i mersûme def‘-i mezkûruna ikāmet-i beyyine edemeyip bi’t-taleb mesfûr Hıristo ba‘de’t-tahlîfü’ş-şer‘î Nasrâniye-i mersûmun ikrârıyla lâzım gelen meblağ-ı bâkī-i mezkûr kırk sekiz guruşu müdde‘î-i mersûm A‘mâ Hıristo zimmîye edâya mesfûre Sofya Nasrâniye’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 29 Ra sene [1]221.