Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 149 Hüküm no: 147 Orijinal metin no: [13a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Mehmed Salih Beşe’nin kendisine itâat etmediği iddiasıyla karısı Nefise aleyhine açtığı davada davalının kocasına itâat etmesinin öğütlendiği Galata’da Câmi‘-i kebîr Mahallesi’nde sâkin Kalyoncu Mehmed Salih Beşe b. Hasan nâm kimesne Galata Bâb Mahkemesi’nde meclis-i şer‘de zevce-i medhûlün-bihâsı mu‘arrefetü’z-zât Nefîse bt. Ebûbekir nâm hatun muvâcehesinde mezbûre Nefîse Hatun’un vâlidesi zâtı mu‘arrefe Âişe bt. Abdullah nâm hatun hâzıra olduğu hâlde mezbûre Nefîse Hatun zevc-i dâhilim olup mehr-i mu‘accelini kendiye îfâ etmişiken bana itâ‘at ve inkıyâddan ibâ vü imtinâ‘ edip vâlidesi hâzıra-i mezbûre Âişe Hatun’un menzilinde beytûtet etmekle bana itâ‘at ve inkıyâda zevcem mezbûreye tenbîh olunmak matlûbumdur dedikde ol dahi ber-vech-i muharrer ikrâr u i‘tirâf etmeğin alâ-mûcibi ikrârihâ zevci müdde‘î-i mezbûra itâ‘at ve inkıyâda zevcesi mezbûre Nefîse Hatun’a tenbîh olunduğu bi’l-iltimâs huzûr-ı âlîlerine i‘lâm olundu. Fî-selhi Ra sene 1221.