Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 149 Hüküm no: 148 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berabyon bt. Adami’nin tasarrufundaki vakıf arsası üzerine yapılan menzili tahliye edip Katerina bt. Ağyazar’a teslim etmesine karar verildiği Derûn-ı arzuhâlde mersûmetü’l-ism mu‘arrefetü’ş-şahs Berabyon bt. Adami nâm Nasrâniye Galata Bâb Mahkemesi’nde meclis-i şer‘de arzuhâl eden Artin zimmînin anası Katerina bt. Ağyazar v. Ağyazar nâm Nasrâniye tarafından husûs-ı âtîde vekîl olduğu şahs-ı merkūmeyi bi’l-mu‘arrefeti’ş-şer‘iyye ârifân Bedros v. Ohannes ve Artin v. Bogos nâm zimmîler şehâdetleriyle sâbit olan Bedros v. Matyo nâm zimmî muvâcehesinde nezâret-i aliyyelerinde olan evkāfdan ( ) vakıf müstağallâtından zikri âtî vakıf menzilin mütevelliyesi Nesîbe bt. Yusuf nâm hatun ile câbî-i vakf el-Hâc Ya‘kub Efendi hâzır oldukları hâlde ben bin iki yüz on yedi senesinde müvekkile-i mersûme Katerina yedinden ve mâlından istikrâz ve kabz eylediğim bin iki yüz guruş mukābelesinde vakf-ı mezkûr müstegallâtından Galata hâricinde Tomtom Mahallesi’nde Kalaycı odalarında vâki‘ bir tarafdan Taşçı Kristo zimmî menzili ve bir tarafdan Galata Saray-ı Hümâyûnu bahçesi ve bir tarafdan âhar menzil ve bir tarafdan ba‘zan Derzi Kaput zimmî ve ba‘zan tarîk-i hâs ile mahdûd terbî‘an iki yüz elli üç zirâ‘ muhterik menzil arsası beher şehr yirmi bir buçuk akçe icâre-i müeccele ve mu‘accele-i ma‘lûme ile tasarrufunda iken târih-i merkūmdan arsa-yı mahdûde-i mezkûreyi bi-emr-i mütevellî müvekkile-i mersûme Katerina Nasrâniye’ye vefâen fâriğa olduğumdan sonra müvekkile-i mersûme dahi arsa-yı mezkûre üzerine kendi mâlıyla teberru‘an li’l-vakf müceddeden menzil binâ ve inşâ ve derûnunda beni iskân etmişidi el-hâletü hâzihî me’hûzum olan meblağ-ı mezkûr bin iki yüz guruşu yedinden ahz-birle menzil-i mezkûru teberru‘an li’l-vakf bi-emr-i mütevellî bana fâriğa müvekkile-i mersûme Katerina Nasrâniye’ye izâfetle vekîl-i mersûma tenbîh olunmak matlûbumdur deyü da‘vâ ettikde vekîl-i mersûm dahi cevâbında müdde‘iye-i Nasrâniye-i mersûme müvekkilem mesfûre Katerina Nasrâniye yedimden makbûz olan meblağ-ı mezkûr bin iki yüz guruş bedel mukābelesinde târih-i mezkûrda arsa-yı mahdûde-i mezkûreyi müvekkile-i mersûme Katerina Nasrâniye’ye bâ-re’y-i mütevellî ferağ-ı kat‘î-i mu‘teber ile fâriğa oldukdan sonra ferağ-ı merkūm ferağ-ı kat‘î olmadığını mahzar-ı şuhûdda ikrâr ve işhâd ve arsa-yı mezkûreye ve ziyâde bedeline müte‘allika da‘vâdan müvekkilem mersûme Katerina Nasrâniye’nin zimmetini ibrâ ve iskāt müvekkilem mersûme dahi ibrâ-i mezkûru kabûl etmişidi deyü ba‘de’d-def‘ ve’l-inkâr dâfi‘-i vekîl-i mersûm def‘-i mezkûrunu mahallinde lede’t-tezkiye makbûlü’ş-şehâde idükleri ihbâr olunan Manuk v. Mardros ve İbrail v. Aknasoda nâm zimmîler şehâdetleriyle mersûme Berabyon Nasrâniye muvâcehesinde vech-i şer‘î üzere isbât etmeğin mûcebince müdde‘iye-i mersûme Berabyon Nasrâniye da‘vâ-yı mezkûresiyle müvekkile-i mersûme Katerina Nasrâniye’ye bî-vech mu‘ârazadan ba‘de’l-men‘ vekîl-i mersûmun talebiyle menzil-i mezkûru tahliye ve müvekkile-i mersûme Katerina Nasrâniye için vekîl-i mersûm Bedros zimmîye teslîme mersûme Berabyon Nasrâniye’ye tenbîh olunduğu bi’l-iltimâs ve mübâşirleri es-Seyyid Ali Çavuş kulları yediyle huzûr-ı âlîlerini i‘lâm olundu. Fî 18 Ra sene [1]221.