Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 153 Hüküm no: 155 Orijinal metin no: [14a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalpakçı Kosti v. Anton’un Hıristo v. Yuvan aleyhine açtığı alacak davasının tehîr edildiği Kalpakçı esnâfından Kosti v. Anton zimmî Galata’da mahfil-i kazâda Hıristo v. Yuvan nâm şâbb-ı emred muvâcehesinde şâbb-ı mersûm Hıristo zimmetinde cihet-i karzdan yüz guruş alacak hakkım olmağla hâlâ taleb ederim deyü da‘vâ eyledikde ol dahi cevâbında inkârından mâ‘adâ mersûm Hıristo şâbb-ı emred ve müdde‘î-i mersûm dahi mazanne-i sû’-i töhmet olup ve bu makūle şâbb-ı emredden hukūk da‘vâsı istimâ‘ından bâ-emr-i hümâyûn hükkâm-ı şer‘î memnû‘lar olmağla müdde‘î-i mersûm Kosti zimmînin da‘vâsı şâbb-ı mersûmun vakt-i ilticâsına tevkīf olunduğu bi’[l]-iltimâs huzûr-ı âlîlerine i‘lâm olundu. Fî 3 Rebî‘ülâhir sene [1]221.