Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 152 Hüküm no: 154 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa’nın kendisini dövüp bir dişini çıkardığı iddiasıyla kocası Topçu İbrahim Beşe aleyhine açtığı davada iddiasını ispat edemediği Kasaba-i Tophane’de el-Hâc Receb Mahallesi’nde sâkine ve zâtı mu‘arrefe Fâtıma bt. Mustafa nâm hatun Galata’da mahfil-i kazâda zevc-i dâhili Topçu İbrahim Beşe b. Ali muvâcehesinde zevcim mezbûr İbrahim Beşe târih-i i‘lâmdan üç gün mukaddem bi-gayr-ı hak yumruk ile ağzıma darb ve bir dişimi ihrâc etmekle mûcib-i şer‘îsini zevcim mezbûr[dan] taleb ederim deyü ba‘de’d-da‘vâ ve inkâr müdde‘iye-i mezbûre ber-vech-i muharrer müdde‘âsına ikāmet-i beyyineden izhâr-ı acz-birle bi’t-taleb mezbûr İbrahim Beşe ber-vech-i şer‘î tahlîf olunmağın mûcebince müdde‘iye-i mezbûre da‘vâ-yı mezkûresiyle zevci mezbûr İbrahim Beşe’yi bilâ-beyyine mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 28 Ra sene [1]221.