Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 162 Hüküm no: 173 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun’un, dükkanının üzerine yaptığı odalarla evinin deniz manzarasını kapatan Bakkāl Yorgi aleyhine dava açtığı Ma‘rûz Sâdır olan fermân-ı âlîlerine imtisâlen mahrûse-i Galata Mahkemesi’nden mürsel vekāyi‘ kâtibimiz Şerîf Mehmed Emin Efendi dâ‘îleri hâssa mi‘mârânından es-Seyyid Salih Halîfe ile mahrûse-i mezbûre muzâfâtından İstinye nâhiyesine tâbi‘ Rumeli Boğazkesen Hisarı’nda Hacı Pürtek? Mahallesi’nde kâin zikri câ’î münâza‘un-fih olan bakkāl dükkânına varıp huzûr-ı Müslimînde akd-i meclis-i şer‘-i şerîf-i nebevî eyledikde tarîk-i âm aşurı dükkân-ı merkūm karşısında kâin menzilin mutasarrıfesi sâhibe-i arzuhâl mu‘arrefetü’z-zât Hadice Hatun bt. Süleyman meclis-i ma‘kūd-ı mezkûrda bakkāl gediği tâ‘bir olunur âlât-ı lâzımenin mutasarrıfı Bakkāl Yorgi zimmî hâzır olduğu hâlde takrîr-i kelâm edip işbu mu‘âyene olunan bakkāl dükkânı fevkinde kadîmî ahşâbdan oda yoğiken hâzır-ı mersûm Yorgi zimmî bu esnâda dükkân-ı merkūm müştemilâtından deryâ tarafından kayıkhâne üzerinde zehâir vaz‘ eylediği oda misilli kadîm olan ebniyeyi ta‘mîre mübâşeret eyledikde üzerine müceddeden iki bâb sagīr oda ve bir sagīr sofa ihdâs edip menzilimin deryâya olan nezâretine mâni‘ olmağla men‘ u def‘ olunmak murâdımdır deyü teşekkî eyledikde müdde‘iye-i mezbûrenin takrîr-i meşrûhu üzere mâni‘-i nezâret da‘vâsı eğerçi zarar-ı şer‘îden olmayıp lâkin ebniye husûsunda mukaddemce sâdır olan fermân-ı âlîye inkıyâden istikşâf-i hâl için kâtib-i mezbûr ve mi‘mâr-ı merkūm ve Müslimûn-ı hâzirûn dükkân-ı mezkûru ve kadîm olan müştemilât-ı merkūmeyi mu‘âyene ve mesâha eylediklerinde dükkân-ı mezkûrun kadîmî deryâ tarafından alçak kayıkhâne üzerinde zehâir ve eşyâ vaz‘ olunacak ahşâbdan mahzen misilli terbî‘î seksen zirâ‘ ebniyeyi müştemil bir kıt‘a bakkāl dükkânı iken mahâll-i mezkûr üzerine tûlen on ve arzan sekiz terbî‘an seksen zirâ‘ sagīr iki bâb oda ve bir sagīr sofa ihdâs eylediğini hisâr-ı merkūm ahâlîsinden otuz nefer mazbûtü’l-esâmî Müslimûn haber verdiklerini ve bu vechile atîk ve cedîd binânın kaddi altı zirâ‘ on dört parmağa bâliğ olup ancak muhdes olan odaların sıvası nâkıs kalmış idüğünü kâtib-i mezbûr mahallinde tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ etmeğin bu sûretde madde-i mezkûre umûr-ı nizâmîden olup ihdâs olunan ebniyenin ref‘ ve ibkāsı re’y-i rezîn-i âsafânelerine menût mevâddan idüğü bi’l-iltimâs huzûr-ı âlîlerine i‘lâm olundu. Fî 10 R sene [1]221.