Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 163 Hüküm no: 174 Orijinal metin no: [16a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papuşçu Avanis v. Danyel’in haksız yere aldığını iddia ettiği bazı eşya ve mücevherleriyle alakalı boşandığı karısı Lusik bt. Kirkor’un zimmetini ibra ettiği Ma‘rûz Galata hâricinde Beyoğlu nâm mahalde mütemekkin arzuhâl eden Papuşçu Avanis v. Danyel nâm zimmî Galata Bâb Mahkemesi’nde meclis-i şer‘de derûn-ı arzuhâlde mersûmetü’l-ism şahsı mu‘arrefe zevcesi Lusik bt. Kirkor nâm Nasrâniye muvâcehesinde mersûme Lusik Nasrâniye âyînimiz üzere bilâ-tesmiyetü’l-mehr zevce-i medhûlün-bihâm olup târih-i i‘lâm günü ben zevcem Nasrâniye-i mersûmeyi tatlîk eyledim hukūk-ı zevciyyete Nasrâniye-i mersûme mâlımdan bi-gayr-ı hak ahz u kabz eylediği altı yüz guruş ve dört yüz guruş kıymetli bir çuka ferâce ve iki başlı altın kuşak ma‘a kolan ve bir tek zümrüd altın küpe ve bir damgahâne anteriye ve kıymetlerine müte‘allika da‘vâdan zevcem Nasrâniye-i mersûmenin zimmetini kabûlü hâvî an-inkâr meccânen ibrâ ve iskāt edip fîmâ-ba‘d Nasrâniye-i mersûmenin yed ve zimmetinde kat‘â alacak hakkım kalmayıp da‘vâ ve nizâ‘ım yokdur deyü ikrâr ve tasdîkleri tescîl ve mübâşirleri Kapıkethüdâsı Süleyman kulları yediyle huzûr-ı âlîlerine i‘lâm olundu. Fî 11 R sene [1]221.