Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 166 Hüküm no: 181 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan’ın rüşvet olarak Üstübücü Hacı Mustafa’ya verdiği parasının kendisine iâdesine karar verildiği es-Seyyid Hasan b. es-Seyyid Osman nâm kimesne Galata Bâb Mahkemesi’nde meclis-i şer‘de üstübücü esnâfından el-Hâc Mustafa b. Süleyman muvâcehesinde mezbûr el-Hâc Mustafa târih-i i‘lâmdan beş sene mukaddem esnâf-ı merkūmeye idhâl etmek için mâlımdan bi-tarîkı’r-rüşve doksan guruşumu bi-gayr-ı hak ahz etmekle istirdâd ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını lede’t-tezkiye adl ve makbûlü’ş-şehâde idükleri ihbâr olunan yemenici esnâfından Derviş el-Hâc Ahmed b. Abdullah ve Osman b. Ahmed nâm kimesne şehâdetleriyle mezbûr el-Hâc Mustafa muvâcehesinde vech-i şer‘î üzere isbât etmeğin mûcebince meblağ-ı merkūm doksan guruşu müdde‘î-i mezbûr es-Seyyid Hasan’a redd ü teslîme mezbûr el-Hâc Mustafa’ya tenbîh olunduğu bi’[l]-iltimâs huzûr-ı âlîlerine i‘lâm olundu. Fî 14 R sene [1]221.