Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 184 Hüküm no: 217 Orijinal metin no: [20a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhûm Pusulacı Hacı Mehmed’in Yusuf Çelebi Vakfı’na olan yüz yetmiş dört guruş borcunun terekesinden ödenmesine karar verildiği Nezâret-i dâ‘îlerinde olan evkāfdan Yusuf Çelebi Vakfı’nın mütevellîsi Halil Efendi b. İbrahim Galata’da mahfil-i kazâda es-Seyyid Mehmed Çelebi muvâcehesinde mezbûr es-Seyyid Mehmed’in babası Pusulacı el-Hâc Mehmed vakf-ı mezbûr mâlından istikrâz ve kabz eylediği yüz yetmiş dört guruşu kable’l-edâ fevt olup tereke-i vâfiyyesi oğlu mezbûr kabz etmekle meblağ-ı mezkûru terekesinden bi’t-tevliye taleb ederim deyü da‘vâ eyledikde ol dahi cevâbında babası müteveffâ-i mezbûrun tereke-i vâfiyyesine bi’l-verâse vaz‘-ı yedini ikrâr mâ‘adâyı ba‘de’l-inkâr müdde‘î-i mütevellî-i mezbûr ber-vech-i muharrer müdde‘âsını şehâdetleri makbûle olan es-Seyyid Ali b. el-Hâc İbrahim ve Ömer b. Mustafa şehâdetleriyle muvâcehesinde vech-i şer‘î üzere isbât etmeğin mûcebince yüz yetmiş dört guruşu tereke-i müteveffâ-i mezbûrdan vakf-ı merkūm için mütevellî-i mezbûra edâ ve teslîme mezbûr es-Seyyid Mehmed’e tenbîh olunduğu huzûr-ı âlîlerine i‘lâm olundu. Fî 19 R sene [1]221.