Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 187 Hüküm no: 223 Orijinal metin no: [20b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aci Dimitri v. Hıristo’nun borçlarını emri olmaksızın kendi malından ödeyen Kalfa Seyyid İsmail’in Aci Dimitri aleyhine açtığı alacak davasının meşru olmadığı Hâssa mi‘mâr kalfalarından sâhib-i arzuhâl es-Seyyid İsmail b. es-Seyyid Mustafa Galata Bâb Mahkemesi’nde meclis-i şer‘de derûn-ı arzuhâlde mersûmü’l-ism Aci Dimitri v. Hıristo nâm zimmî muvâcehesinde mersûm Aci Dimitri zimmînin gāibûn ani’l-meclis isimleri ma‘lûmum olmayan beş nefer neccâr zimmîlere altı günde ücret-i necâriyye olmak üzere seksen iki buçuk guruş ve iki vakıyye sandal ve iki vakıyye yeni kalıb çûblar semenlerinden yedi guruş ve on aded pencere parmaklığı semenlerinden on altı guruş otuz beş para ve kayıkçıya ücret-i kayıkdan yirmi guruş ki cem‘ an deyni olan yüz yirmi altı guruş on beş parayı zimmî-i mersûmun emrinsiz ben mâlımdan dâyinlerine edâ etmemle hâlâ zimmî-i mersûmdan taleb ederim deyü tasaddî eylediği da‘vâsı takrîr-i meşrûhu üzere meşrû‘a ve iltifâta şâyân olmayıp mersûm Aci Dimitri zimmîye bî-vech mu‘ârazadan men‘ olunduğu mübâşirleri Mehmed Emin Çavuş kulları yediyle huzûr-ı âlîlerine i‘lâm olundu. Fî 7 Ca sene [1]221.