Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 187 Hüküm no: 224 Orijinal metin no: [20b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nakkaş Seyyid Mehmed Çelebi’nin tasarrufunda bulunan yarım vakıf menzil hissesini kayınvâlidesi Fâtıma bt. Mehmed’e üç yüz guruşa devrettiği Sâhib-i arzuhâl Nakkāş es-Seyyid Mehmed Çelebi b. es-Seyyid İbrahim nâm kimesne Galata’da mahfil-i kazâda sâbıkā kayınvâlidesi derûn-ı arzuhâlde ismi mezkûre ve zâtı şer‘an mu‘arrefe Fâtıma bt. Mehmed nâm hatun muvâcehesinde Galata’ya muzâfe kasaba-i Kasımpaşa’da Kulaksız Ahmed Kapudan Mahallesi’nde vâki‘ bir tarafdan Başçavuş menzili ve bir tarafdan Tekke bahçesi ve bir tarafdan mi‘mâr bahçesi ve bir tarafdan tarîk-i âm ile mahdûde müştemilât-ı ma‘lûmeyi hâvî bir bâb vakıf menzilin nısf-ı şâyi‘i benim ve nısf-ı şâyi‘-i âharı mezbûre Fâtıma Hatun’un bi’l-icâreteyn tasarrufumuzda olup lâkin kābil-i kısmet olmadığı ecilden ben [sen] menzil-i merkūmu muhâye’eten zabt da‘vâsına tasaddî eyledin deyü ben da‘vâya tasaddî eylediğimde ol dahi râziye olmadığından gayrı bâ-defter-i müfredât mâlımdan eşyâ-i ma‘lûmemi fuzûlî zabt eyledin deyü benden da‘vâya tasaddî-birle beynimizde ba‘de vukū‘ı’l-münâza‘a ve bâ-vesâtet-i muslihîn kayınvâlidem mezbûre tasaddî eylediği eşyâ da‘vâsından meccânen fâriğa olup eşyâ-i ma‘lûmeye ve kıymetine müte‘allika âmme-i da‘vâdan benim zimmetimi ibrâ ve iskāt eyledikde ben dahi ibrâsını ba‘de’l-kabûl menzil-i mezkûrda mutasarrıf olduğum nısf hisse-i şâyi‘amı mezbûre Fâtıma Hatun’a üç yüz guruş bedel mukābelesinde bâ-re’y-i mütevellî ferağ-ı kat‘î-i mu‘teber ile ferağa ta‘ahhüd eylediğimde ol dahi râziye olup bu sûretle kat‘-ı münâza‘a eyledik deyü ikrâr ve tasdîkleri bi’[l]-iltimâs mübâşirleri Ali Çavuş kulları yediyle huzûr-ı âlîlerine i‘lâm olundu. Fî 5 Ca sene [1]221.