Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 189 Hüküm no: 228 Orijinal metin no: [21a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Mehmed Beşe’nin ortağı Osman’ın ödemesi için kendisine havale ettiği borcu ödedikten sonra bir miktarını geri istemesinin meşru olmadığı Tüccârdan Mahmud Beşe b. Salih nâm kimesne Galata Bâb Mahkemesi’nde meclis-i şer‘de sefîne reislerinen Hasan Reis b. Osman nâm kimesne muvâcehesinde gāib ani’l-beled inânen şerîkim Osman b. Ali bundan akdem Bahr-ı siyah sevâhilinde Kalas kasabasında mezbûr Hasan Reis’in yedinden poliçe tarîkiyle kabz eylediği bin beş yüz guruşu Âsitâne-i aliyye’de edâ etmek üzere dâyini mezbûr Hasan Reis bâ-mektûb ve bâ-temessük benim üzerime havâle ve mezbûr Hasan Reis dahi havâle-i mezkûreyi kabûl ve sâlifü’z-zikr temessük ve mektûbu ahz eyledikden sonra Âsitâne-i aliyye’ye gelip zikrolunan mektûbu yedime teslîm ve havâle-i merkūmeyi bana i‘lâm ve tefhîm eyledikde ben dahi havâle-i mezkûreyi kabûl ve meblağ-ı merkūmu bi-hükmi’l-havâle kendiye teslîm ve temessük-ı mezkûru ahz ve tahlîs etmişidim lâkin şerîkim gāib-i mezbûr tarafından meblağ-ı mezkûrun üç yüz guruşunu mezbûr Hasan Reis’e teslîm eyleme deyü sonradan mektûb tahrîr etmekle binâen-aleyh ber-vech-i meşrûh bi-hükmi’l-havâle edâ ve teslîm eylediğim meblağ-ı mezkûrun üç yüz guruşunu istirdâd murâdımdır deyü tasaddî eylediği da‘vâsına iltifât olunmayıp mezbûr Hasan Reis’e suâl dahi teveccüh etmediği bi’[l]-iltimâs huzûr-ı âlîlerine i‘lâm olundu. Fî 6 Ca sene [1]221.