Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 190 Hüküm no: 230 Orijinal metin no: [21a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş v. Yani’nin kılavuzluk ücretinden alacağı olduğu iddiasıyla Kapudan Maryato aleyhine açtığı davada iddiasını ispat edemediği Arzuhâl eden Anaştaş v. Yani nâm zimmî Galata Bâb Mahkemesi’nde meclis-i şer‘de Sicilyateyn kapudanlarından derûn-ı arzuhâlde mersûmü’l-ism Maryato v. Kataki nâm müste’men kapudan muvâcehesinde Sicilyateyn tercümânlarından sâir Meşaber hâzır olduğu hâlde ben kapudan-ı mersûmun râkib olduğu sefînede kulağuz olup Âsitâne-i aliyye’den Kırım’a ve onda beş ay meksimiz olup ba‘dehû yine Kırım’dan Âsitâne-i aliyye’ye gelinceye değin dört yüz guruş ücret tesmiyesiyle kulağuzluk hizmetini edip meblağ-ı mezkûrun iki yüz elli guruşun yedinden ba‘de’l-ahz bâkī zimmetinde kalan yüz elli guruşu kapudan-ı mersûmdan taleb ederim deyü da‘vâ ettikde ol dahi cevâbında müdde‘î-i mersûmun kabzını mukırr u mu‘terif olduğu iki yüz elli guruş ücret tesmiyesini ikrâr ziyâde yüz elli guruş müdde‘âsını ba‘de’l-inkâr müdde‘î-i mersûm Anaştaş zimmî ziyâde-i mezkûre müdde‘âsına ikāmet-i beyyine edemeyip tahlîfe dahi tâlib olmamağın mûcebince müdde‘î-i mersûm Anaştaş zimmî ziyâde-i mezkûre yüz elli guruş da‘vâsıyla kapudan-ı mesfûra bilâ-beyyine mu‘ârazadan men‘ olunduğu huzûr-ı âlîlerine i‘lâm olundu. Fî 9 Ca sene [1]221.