Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 191 Hüküm no: 232 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Derviş Seyyid Ali Beşe’nin tasarrufundaki vakıf menzile müdahale ettiği iddiasıyla Taşçı Mehmed Usta aleyhine açtığı men davasında yüz guruşa sulh olduğu Sâhib-i arzuhâl Kalyoncu Derviş es-Seyyid Ali Beşe b. es-Seyyid İsmail Galata’da mahfil-i kazâda derûn-ı arzuhâlde mezkûrü’l-ism Taşçı Mehmed Usta b. Mustafa muvâcehesinde nezâreti dâ‘îlerine meşrûta Na‘lıncı el-Hâc Hasan Vakfı’nın mütevellîsi Mustafa Efendi hâzır olduğu hâlde vakf-ı mezbûr müstegallâtından olup kasaba-i Kasımpaşa’da kâin vakf-ı mezbûrun kendi ismiyle müsemmâ mahallede kâin lede’l-ahâlî ma‘lûmü’l-hudûd bir bâb vakıf menzil şehriye kırk beşer akçe icâre-i müeccele ile babam mezbûrun tasarrufunda iken vefât eyledikde menzil-i mezkûr âdiyyen bana intikāl etmişiken mezbûr Taşçı Mehmed Usta menzil-i mezkûru fuzûlen tasarruf eder suâl olunup kasr-ı yedine tenbîh olunmak matlûbumdur deyü tasaddî eylediğim da‘vâmdan bâ-tavassut-ı muslihîn mezbûr Taşçı Mehmed Usta ile yüz guruşa sulh olduğumda ol dahi sulh-ı mezkûru ba‘de’l-kabûl menzil-i mezkûra ve bedeline müte‘allika âmme-i da‘vâdan mezbûr Taşçı Mehmed Usta ba‘de’t-tasdîk ibrâdan müstesnâ bedel-i sulh-ı mezkûr yüz guruş müdde‘î-i mezbûra deyni olduğunu ikrâr u i‘tirâf etmeğin alâ-mûcibi ikrârihi bedel-i sulh-ı mezkûr yüz guruşu müdde‘î-i mezbûr Derviş es-Seyyid Ali Beşe’ye edâsıyla mezbûr Taşçı Mehmed Usta ilzâm olundu. Fî 9 Ca sene [1]221.