Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 192 Hüküm no: 234 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamdullah Efendi’nin câbisi olduğu Semmur Hacı Ali Vakfı’na yedi yüz elli altı guruş borcu olduğunu ikrar ettiği Nezâreti dâ‘îlerinde meşrûta evkāfdan merhûm Semmur el-Hâc Ali Vakfı’nın bi’l-meşrûta mütevellîsi sâhib-i arzuhâl Mehmed Said Ağa b. Ali Galata Bâb Mahkemesi’nde meclis-i şer‘de derûn-ı arzuhâlde mezkûrü’l-ism vakf-ı merkūmun câbîsi Hamdullah Efendi b. Mustafa muvâcehesinde mezbûr Hamdullah Efendi ben bundan mukaddem vakf-ı mezkûrun mütevellîsi olan Himmetzâde merhûm eş-Şeyh Bahâüddin’in kāimmakāmı olup yedinde olan defter-i muhâsebe mantûkunca kāimmakāmlığı hengâmında vakf-ı mezkûr mâlından kabz ve kendi umûruna sarfla istihlâk eylediği 956 guruş elli akçenin 200 guruş 50 akçeyi cânib-i vakfa edâ ve teslîm bâkī zimmetinde kalan 756 guruşu mezbûr Hamdullah Efendi[‘den] bi’t-tevliye taleb ederim deyü da‘vâ eyledikde ol dahi cevâbında ber-vech-i muharrer tâyi‘an ve kat‘iyyen ikrâr u i‘tirâf etmeğin alâ-mûcibi ikrârihi meblağ-ı bâkī-i merkūm yedi yüz elli altı guruşu vakf-ı merkūm için mütevellî-i müdde‘î-i mezbûra edâ ve teslîme mezbûr Hamdullah Efendi ilzâm olunduğu bi’[l]-iltimâs huzûr-ı âlîlerine i‘lâm olundu. Fî 15 Ra sene [1]221.