Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 205 Hüküm no: 260 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador v. Kiryako’nun Hamal Kigork ve kardeşi Avanis aleyhine açtığı alacak davasında iddiasını ispat edemediği Arzuhâl eden Asvador v. Kiryako nâm zimmî Galata Bâb Mahkemesi’nde meclis-i şer‘-i kavîmde derûn-ı arzuhâlde mesfûru’l-ism Hamal Kigork ve karındaşı Avanis veledey Serkiz zimmîler muvâcehelerinde mersûmân Kigork ve Avanis zimmîlerden herbiri âharın zimmetine lâzım gelen meblağa kefîl ve zâmin olmak üzere târih-i i‘lâmdan dokuz ay mukaddem medîne-i Üsküdar’da Bağlarbaşı nâm mevzi‘de mâlımdan ve yedimden iktirâz ve kabz eyledikleri üç yüz guruşu hâlâ mersûmândan taleb ederim deyü da‘vâ eyledikde onlar dahi cevâblarında külliyyen ba‘de’l-inkâr müdde‘î-i mersûm Asvador zimmî ber-vech-i muharrer müdde‘âsına ikāmet-i beyyine edemeyip bi’t-taleb mersûmândan herbiri ba‘de’t-tahlîfü’ş-şer‘î mûcebince müdde‘î-i mersûm Asvador zimmî da‘vâ-yı mezkûresiyle zimmîyânı bilâ-beyyine mu‘ârazadan men‘ olunduğu mübâşirleri Ömer Çavuş kulları yediyle huzûr-ı âlîlerine i‘lâm olundu. Fî 20 Ca sene [1]221.