Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 204 Hüküm no: 259 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yelkenci Seyyid Mehmed’in evinin üzerine yaptığı yeni katın pencerelerinden komşusu Kalafatçı Mustafa’nın evinin kadınlar kısmı görüldüğü için gerekli tedbirleri almasına karar verildiği Sâdır olan fermân-ı âlîlerine imtisâlen savb-ı şer‘-i enverden irsâl olunan müderrisîn-i kirâmdan Kâtib es-Seyyid Abdülfettâh Efendi dâ‘îleri ve hâssa mi‘mârânından Ser-halîfe es-Seyyid İsmail ve Mehmed Ârif halîfeler ile Galata Okçu Musa Mahallesi’nde vâki‘ galle ve tevliyeti mahalle-i mezbûre imâmlarına meşrûta münâza‘un-fih olan bir bâb vakıf menzile varıp huzûr-ı Müslimînde akd-i meclis-i şer‘-i âlî eyledikde menzil-i mezkûrun tarîk-i âm aşurı karşısında kâin yine vakf-ı mezbûrdan bir bâb vakıf menzile ale’l-iştirâki’s-seviyy mutasarrıfe olan sâhibey arzuhâl Kalafatçı Mustafa b. Hüseyin ve zâtı mu‘arrefe Emine bt. Mustafa nâm zevcân meclis-i ma‘kūd-ı mezkûrda menzil-i mezkûrun mutasarrıfı derûn-ı arzuhâlde mezkûrü’l-ism Yelkenci es-Seyyid Mehmed b. es-Seyyid Osman nâm kimesne muvâcehesinde mahalle-i mezbûre imâmı ve menzileyn-i mezkûreynin bi’l-meşrûta mütevellîsi Hâfız Abdi Efendi hâzır olduğu hâlde mezbûr es-Seyyid Mehmed binâsına şürû‘ eylediği menzilinin tabaka-i ulyâsında vaz‘-ı kadîminden ziyâde mugāyir-i fermân-ı âlî şehnişîn binâ ve ihdâs eylediği dört aded pencerelerinden bizim menzilimizin makarr-ı nisvân olan mahalline nezâreti olup ol vechile zarar-ı şer‘îsi olmağla zarar-ı şer‘îsini def‘a mezbûra tenbîh olunmak matlûbumuzdur deyü da‘vâ eylediklerinde mi‘mârân-ı mezbûrân ve Müslimûn-ı hâzirûn menzil-i mezkûra ba‘de’n-nazar ve’l-mu‘âyene ve’l-mesâha mezbûr es-Seyyid Mehmed ihdâs eylediği arzan yirmi yedi parmak şehnişînin ancak dokuz parmak mahalli mugāyir-i emr-i âlî olmağla ancak arzan dokuz parmak mahallin kat‘ı iktizâ eylediği ve zikrolunan dört aded muhdes pencerelerin zarar-ı şer‘îsi olduğunu mi‘mârân-ı mezbûrân haber vermeleriyle mûcebince arzan on sekiz parmakdan ziyâde şehnişîn itâle etmemek üzere zikrolunan pencerelerin zarar-ı şer‘îsini def‘a mezbûr es-Seyyid Mehmed’e tenbîh eylediğini kâtib-i mezbûr mahallinde tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri tescîl ve mübâşirleri Emin Çavuş kulları yediyle huzûr-ı âlîlerine i‘lâm olundu. Fî 20 Ca sene [1]221.