Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 210 Hüküm no: 268 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Seyyid Hasan’ın fesholunan mudarabe ortaklığından Mehmed Salih Reis’ten dört yüz kırk üç guruş alacağı olduğu Mahmiye-i İstanbul’da Kapan-ı dakīk tüccârından es-Seyyid Hasan b. es-Seyyid Mustafa nâm kimesne Galata Bâb Mahkemesi’nde meclis-i şer‘de sefîne reislerinden Mehmed Salih Reis b. İbrahim nâm kimesne muvâcehesinde ben bundan akdem fâide-i hâsılası beynimizde münâsafaten olmak üzere bi-tarîkı’l-mudârabe mezbûr Mehmed Salih Reis yedine mâlımdan def‘ u teslîm eylediğim bin guruşu ba‘de’l-i‘mâl fesh-i akd-i mudârabe-birle fâide-i hâsıladan ba‘de’l-hesâb benim hisseme isâbet eden yüz kırk üç guruş ki cem‘an bin yüz kırk üç guruşun yedi yüz guruşunu yedinden ba‘de’l-ahz bâkī kalan dört yüz kırk üç guruşu bana vermeyip yedinde kalmağla hâlâ taleb ederim deyü da‘vâ eyledikde ol dahi cevâbında husûs-ı mezkûru ikrâr lâkin meblağ-ı bâkī-i mezkûrun üç yüz elli dokuz guruşunu dahi müdde‘î-i mezbûrun emriyle gāib ani’l-meclis Kādı Mehmed nâm kimesneye vermişidim deyü mikdâr-ı mezkûrda eylediği def‘ine ikāmet-i beyyine edemeyip bi’t-taleb müdde‘î-i mezbûr es-Seyyid Hasan ba‘de’t-tahlîfü’ş-şer‘î mezbûr Mehmed Salih Reis’in ikrârı mûcebince meblağ-ı bâkī-i mezkûr dört yüz kırk üç guruşu müdde‘î-i mezbûr es-Seyyid Hasan’a edâ ve teslîme mezbûr Mehmed Salih Reis’e tenbîh olunduğu bi’l-iltimâs huzûr-ı âlîlerine i‘lâm olundu. Fî 3 C sene 1221.