Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 213 Hüküm no: 274 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin kayık yapıcılık ücretinden alacağı olduğu iddiasıyla Seyyid Ahmed aleyhine açtığı davada yirmi beş guruşa sulh olduğu Kayık Yapıcı İbrahim Beşe b. İsmail nâm kimesne Galata Bâb Mahkemesi’nde meclis-i şer‘de es-Seyyid Ahmed b. es-Seyyid Hüseyin nâm kimesne muvâcehesinde mezbûr es-Seyyid Ahmed zimmetinde kayık yapıcılık ücretinden yüz on üç guruşdan bâkī otuz sekiz guruş alacak hakkım olmağla hâlâ taleb ederim deyü tasaddî eylediğim da‘vâmdan bâ-vesâtet-i muslihîn mezbûr es-Seyyid Ahmed ile yirmi beş guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ on üç guruş mütâlebesine müte‘allika da‘vâdan mezbûr es-Seyyid Ahmed’in zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı mezkûr yirmi beş guruşu taleb ederim deyü ba‘de’d-da‘vâ ve ikrâr alâ-mûcibi ikrârihi bedel-i sulh-ı mezkûr yirmi beş guruşun müdde‘î-i mezbûr İbrahim Beşe’ye edâsıyla mezbûr es-Seyyid Ahmed ilzâm olunduğu bi’[l]-iltimâs huzûr-ı âlîlerine i‘lâm olundu. Fî 27 Ca sene [1]221.