Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 213 Hüküm no: 275 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamamcı Hacı Osman Beşe’nin tasarrufundaki berber dükkanı ve kahvehanenin kiracısı Aci Yani v. Yorgi’den elli altı guruş on para alacağı olduğu İstanbul’da vâki‘ Câmi‘-i şerîf-i Ayasofya-i kebîr Evkāfı’ndan olup mahrûse-i Galata hısnı ebvâbından Karaköy Kapısı hâricinde boyacı dükkânı karşısında kâin bir kıt‘a vakıf berber dükkânı ve kahvehânenin hisse-i ma‘lûmesine bi’l-icâreteyn mutasarrıf Hammâmî el-Hâc Osman Beşe el-Hâc Osman’ın oğlu ve tarafından zikri âtî meblağı taleb ve da‘vâ ve ahz u kabza vekâleti Mehmed Emin Ağa b. Ali ve İsmail Beşe b. Halil şehâdetleriyle zâhir olan Abdülhamid Ağa nâm kimesne Galata’da mahfil-i kazâda dükkân-ı merkūmun kezâlik hisse-i ma‘lûmesine mutasarrıf ve derûnunda mevcûde gedik tâ‘bir olunan eşyâya mâlik olan Aci Yani v. Yorgi zimmî muvâcehesinde dükkân-ı merkūmun beher şehr dokuz guruş i‘tibârıyla yüz elli para şehriyesi babam müvekkilim mezbûrun ber-vech-i muharrer tasarrufunda ve hisse-i merkūme hissedârı mersûmun taht-ı icâresinde olup sene-i sâbıkā Saferi’nin yirminci gününden târih-i i‘lâma gelince ücret-i merkūmeden zimmî-i mersûmun zimmetinde müctemi‘a elli altı guruş on parayı bi’l-vekâle taleb ederim deyü ba‘de’d-da‘vâ ve’s-suâl ol dahi cevâbında ber-vech-i muharrer ikrâr u i‘tirâf [edip] dükkân-ı merkūmda el-ân benim mutasarrıf olduğum hisse mukaddemâ müvekkilim mezbûrun taht-ı tasarrufunda ve müvekkilim mezbûrun mutasarrıf olduğu hisse-i mezkûre dahi âharın tasarrufunda iken ber-vech-i muharrer elli para hisseyi âhardan bedel-i misliyye bana tefevvüz edivermek şartıyla müvekkilim mezbûr hissesini bâ-re’y-i mütevellî bedel-i makbûz mukābelesinde bana ferağ edip ferağ-ı merkūm şart-ı mezkûra mukārenetle fâsid olmağ[la] makbûzu olan bedeli bana verile hisse-i merkūmeyi geri tefevvüze müvekkilim mezbûr için mücerred oğlu olduğuna binâen müdde‘î-i mezbûra tenbîh olunmak murâdımdır deyü tasaddî eylediği şart da‘vâsı gāib-i mezbûrun huzûruna ve nâzır-ı vakfa ba‘de’t-tevkīf ikrârı mûcebince elli altı guruş on parayı müvekkilim için vekîl-i mezbûra edâya zimmî-i mersûma tenbîh olunduğu bi’l-iltimâs huzûr-ı âlîlerine i‘lâm olundu. Fî 24 Ca sene [1]221.