Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 216 Hüküm no: 281 Orijinal metin no: [26b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elbistanî Hacı Mehmed’in talebi üzerine mahzen kiracısı Lazari v. Aron’un mahzeni tahliye edip davacıya teslimine karar verildiği Zikri âtî mahzenin bi’l-icâreteyn mutasarrıfı Galata sükkânından Elbistanî el-Hâc Mehmed b. Abdullah tarafından husûs-ı âtî[de] vekîl-i müseccel-i şer‘îsi Giridî Cizyedâr Mustafa b. İshak Galata’da mahfil-i kazâda Lazari v. Aron nâm Yahûdi muvâcehesinde Galata’da Kıriş Hân derûnunda kâin müvekkilim mezbûrun mutasarrıf olduğu bir bâb kârgîr mahzende Yahûdi-i mersûm yüz para şehriye kirâyla müsteciri olup mahzen-i merkūmda müvekkilim mezbûra lüzûmu olduğuna binâen gāyet-i şehr-i i‘lâma izâfetle bi’l-vekâle fesh-i îcâr etmemle suâl olunup mahzen-i merkūmu gāyet-i şehr-i merkūmda tahliye ve müvekkilim mezbûr için bana teslîme Yahûdi-i mersûma tenbîh olunmak bi’l-vekâle murâdımdır deyü ba‘de’d-da‘vâ ve’s-suâl ve’l-ikrâr alâ-mûcibi ikrârihi bu mahzen-i merkūmu gāyet-i şehr-i mezkûrda tahliye ve mutasarrıfı müvekkilim mezbûr için vekîli mezbûra teslîme Yahûdi-i mersûma tenbîh olunduğu bi’[l]-iltimâs [huzûr-ı âlîlerine i‘lâm olundu.] Fî 3 C sene [1]221.