Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 219 Hüküm no: 288 Orijinal metin no: [27a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Hatun’un kendisine hibe ettikten sonra geri aldığını iddia ettiği bir elmas çiçeğin iadesi talebiyle eski kocası Yorgancı Mehmed aleyhine açtığı davada iddiasını ispat edemediği Galata’ya muzâfe kasaba-i Kasımpaşa’da el-Hâc Ferhad Mahallesi’nde sâkine Şerife Fâtıma bt. Mustafa b. Abdullah nâm hatun tarafından husûs-ı âti’z-zikrde vekîl-i müseccel-i şer‘îsi Mehmed Salih Ağa b. Mehmed Beşe b. Abdullah nâm kimesne Galata Bâb Mahkemesi’nde meclis-i şer‘de müvekkile-i mezbûrenin zevc-i sâbıkı Yorganî Mehmed b. Abdullah nâm kimesne muvâcehesinde müvekkilem mezbûre Şerife Fâtıma Hatun’un hîn-i akd-i nikâhda mehr-i mu‘accel tesmiye olunan mecmû‘u cedîd yapağı memlû iki minder ve kıtık memlû altı beledî yasdık ve iki çit mak‘ad ve yapağı memlû bir çit döşek ve bir çit baş yasdığı ve bir yorganı mezbûr Mehmed Beşe müvekkilem mezbûre için bana tamamen def‘ u teslîm ben dahi ber-vech-i muharrer yedinden ahz u kabz eylediğimden sonra mezbûr Mehmed Beşe müvekkilem mezbûre zevcesi iken mâlından müvekkilem mezbûreye hibe-i sahîha-i şer‘iyye ile hibe ve temlîk ve teslîm eylediği bir elmas çiçeği mezbûr Mehmed Beşe bi-gayr-ı hakkın ahz edip yedinde mevcûde olmağa hâlâ bi’l-vekâle taleb ederim deyü da‘vâ ol dahi külliyyen ba‘de’l-inkâr müdde‘î-i vekîl-i mezbûr Mehmed Salih Ağa ber-vech-i muharrer müdde‘âsına ikāmet-i beyyine edemeyip bi’t-taleb mezbûr Mehmed Beşe ba‘de’t-tahlîfü’ş-şer‘î mûcebince müdde‘î-i vekîl-i mezbûr Mehmed Salih Ağa da‘vâ-yı mezkûresiyle mezbûr Mehmed Beşe’ye bilâ-beyyine mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 6 C sene [1]221.