Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 219 Hüküm no: 289 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in bazı eşya bedelinden ve karzdan Zenciye Ayşe’den iki yüz otuz guruş alacağı olduğu iddiasıyla açtığı davada iddiasını ispat edemediği Mahrûse-i Galata’da Emekyemez Mahallesi’nde sâkine sâhibe-i arzuhâl mu‘arrefetü’z-zât Hadice bt. Mehmed nâm hatun Galata’da mahfil-i kazâda meclis olup derûn-ı arzuhâlde mezkûretü’l-ism kezâlik mu‘arrefetü’z-zât Zenciye Âişe bt. Abdullah nâm hatun muvâcehesinde mezbûre Âişe Hatun mahalle-i merkūmede vâki‘ menzilim derûnunda mevcûde eşyâ-i memlûkemden bir kākum kürk ve bir sevâyi anteri biri çiçekli ve biri câr iki şal ve bir top Şam alacası ve beş buçuk zirâ‘ çuka ve bir çift çatma yasdık ve altı zirâ‘ sandal ve iki bürüncek gömlek ve iki penbezâr gömlek ve üç bez gömlek ve otuz altı zirâ‘ çözme çarşaflık bez ve üç başlı bir gümüş kostak ve bir elmas çiçek ve bir menefşe havlu ve bir minder sinisi ve iki fağfûr fincan ma‘a tonbak altı zarf ve bir top sincabî boğasımı bi-gayr-ı hak ahz etmekle mevcûd ise aynılarını müstehlek ise ba‘de’s-sübût kıymet-i şer‘iyyeleri ile mezbûrenin zimmetinde cihet-i karzdan alacağım olan yirmi yedi guruş ve bir câr şal semeninden seksen guruş ma‘lûmü’l-zirâ‘ bez semeninden yüz yirmi üç guruş ki cem‘an iki yüz otuz guruşu hâlâ taleb ederim deyü da‘vâ eyledikde ol dahi cevâbında külliyyen ba‘de’l-inkâr müdde‘iye-i mezbûre ber-vech-i muharrer müdde‘âsına ikāmet-i beyyine edemeyip tahlîfe dahi tâlib olmamağın mûcebince müdde‘iye-i mezbûre Hadice Hatun da‘vâ-yı mezkûresiyle mezbûre Zenciye Âişe Hatun’a bilâ-beyyine mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 7 C sene [1]221.