Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 225 Hüküm no: 300 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Mehmed Beşe’nin yeni yaptığı evinin pencereleri komşusu Ayşe Hatun’un evinin mahremiyetini ihlal ettiğinden ilgili kısımlarının tadiline karar verildiği Sâdır olan fermân-ı âlîlerine imtisâlen Galata Mahkemesi’nden me’zûnen mürsel kuzâtdan Kâtib Süleyman Reşid Efendi dâ‘îleri hâssa mi‘mârânından es-Seyyid Mustafa b. es-Seyyid İbrahim ve Selim Sâbit b. Musa halîfeler ile Galata hâricinde Sururî Efendi Mahallesi’nde kâin zikri âtî münâza‘un-fih olan vakıf menzile varıp huzûr-ı Müslimînde akd-i meclis-i şer‘-i kavîm ettikde menzil-i merkūmun mutasarrıfesi sâhibe-i arzuhâl mu‘arrefetü’z-zât Âişe bt. Mustafa nâm hatun meclis-i ma‘kūd-ı mezkûrdan hem-civârı olup mesbûku’l-beyân Sururî Efendi Vakfı’ndan bir bâb menzile mutasarrıfe derûn-ı arzuhâlde mezkûrü’l-ism Kürkçü Mehmed Beşe b. Abdülbaki muvâcehesinde menzileyn-i mezbûreyn mütevellîleri taraflarından İmâm Mahmud Efendi ve Hoca Veliyüddin Efendi hâzır oldukları hâlde mezbûr Mehmed Beşe menzil-i merkūmunu bu esnâda hedm ve müceddeden binâ eylediği tabaka-i ulyâsında sofa ve odasına ihdâs ve küşâd eylediği üç aded vustâsında ihdâs eylediği kezâlik üç aded ve köşede kâin iki aded cem‘an sekiz aded pencerelerinden benim menzilimin bahçesinde kâin makarr-ı nisvân olan matbah ve bi’r-i mâ’ma nezâreti olmağla mu‘âyene olunup <> mezbûr Mehmed Beşe’ye tenbîh olunmak murâdımdır deyü da‘vâ ve o cihetle beynlerinde ba‘de vukū‘ı’l-müşâcere beynleri ıslâh ve tevfîk olunup mezbûr Mehmed Beşe zikrolunan ulyâda bir aded penceresini rızâsıyla sedd ü bend ve mâ‘adâ ulyâda kâin pencerelerine müte‘allik ve bîrûnundan kafes ve fevkānî köşe penceresine tûlen bir zirâ‘ ve kadden iki buçuk zirâ‘ zahrı takozlu tahta perde ve vustâda kâin pencerelerinin zarar-ı şer‘îleri def‘ oluncaya kadar kezâlik tahta perde vaz‘ına ve menzileynin sakfı üzerinde tabanı kuka ve rûyu ziftli oluk vaz‘ını ta‘ahhüd eyledikde müdde‘iye-i mezbûre dahi bu vechile râziye olup külliyyen kat‘-ı münâza‘a ve ref‘-i husûmet eylediklerini mezbûr dâ‘îleri mahallinde tahrîr ve meclis-i şer‘a inhâ ve takrîr eylediği tescîl ve huzûr-ı âlîlerine i‘lâm olundu. Fî-selhi C sene [1]221.