Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 224 Hüküm no: 299 Orijinal metin no: [28a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Yanko v. Andon’un aldığı borç karşılığında Nemçeli Kuyumcu Cani’ye rehin verdiği mücevherlerini üç yüz elli guruş ödeme yapması şartıyla geri almasına karar verildiği Galata ahâlîsinden arzuhâl eden Çukacı Yanko v. Andon zimmî Galata Bâb Mahkemesi’nde meclis-i şer‘-i kavîmde derûn-ı arzuhâlde mersûmü’l-ism Nemçeli Kuyumcu Cani v. Matyo müste’men muvâcehesinde Nemçe tercümânlarından İklili hâzır olduğu hâlde yedimde mâlım olan elmaslı altın bir yüzük ve elmaslı bir haç ve elmaslı bir çiçeğimi bundan akdem müste’men-i mersûm bi-gayr-ı hakkın ahz edip bi-a‘yânihâ yedinde mevcûde olmağla istirdâd ederim deyü ba‘de’d-da‘vâ ve’s-suâl ol dahi cevâbında müdde‘î-i mersûm târih-i i‘lâmdan on beş ay mukaddem yedimden istidâne ve kabz eylediği altı yüz guruş deyni mukābelesinde eşyâ-i merkūmeyi mâlından yedime rehin vaz‘ etmişidi deyü beynlerinde ba‘de vukū‘ı’l-münâza‘a beynleri ıslâh olunup müste’men-i mersûm tasaddî eylediği karz müdde‘âsından zimmî-i mersûm ile üç yüz elli guruşa an-inkâr ba‘de’s-sulh ve’l-kabûl ziyâdeye ve târih-i i‘lâma gelinceye beynlerinde cârî hukūka müte‘allika da‘vâdan zimmî-i mersûmun zimmetini kabûlü hâvî ba‘de’l-ibrâ bedel-i sulh-ı merkūmu müste’men-i mersûma edâ ve teslîme zikrolunan yüzük ve haç ve çiçeği mâliki müdde‘î zimmî-i mersûma redd ü teslîme herbirine tenbîh olunduğu Çukadâr el-Hâc Ebûbekir kulları mübâşeretiyle huzûr-ı âlîlerine i‘lâm olundu. Fî 12 C sene [1]221.