Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 226 Hüküm no: 302 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirci Hüseyin Beşe’nin kendisini bıçakla yaralayan Tersâne Sayıcısı Mustafa Hoca ile yedi yüz guruşa sulh olduğu Kasımpaşa’da Murâbıt Çeşmesi’nde sâkin Demirci Hüseyin Beşe b. Hasan Galata’da mahfil-i kazâda Tersâne-i âmire sayıcılarından Mustafa Hoca b. Mehmed Emin muvâcehesinde mezbûr Mustafa Hoca târih-i i‘lâmdan üç gün mukaddem Cum‘a günü sa‘at on birde çeşme-i mezkûre önünde Yatağan bıçağıyla sağ elimin orta parmağı üzerinden bir yerinden ve sol elimin salavât parmağımın üzerinden bir yerinden ki cem‘an iki yerinden amden bi-gayr-ı hakkın darb ve cerh etmekle mûcib-i şer‘îsini taleb ederim deyü tasaddî eylediğim da‘vâmdan bâ-vesâtet-i muslihîn mezbûr Mustafa Hoca ile yedi yüz guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ cerh-i mezkûra ve mâ-yahdesü minhden ve bi’l-cümle husûs-ı merkūma müte‘allika âmme-i da‘vâdan mezbûr Mustafa Hoca’nın zimmetini ibrâ eyledim dedikde mezbûr yedi yüz guruş mezbûr Mustafa Hoca’nın zimmetinde kalmağla taleb ederim deyü da‘vâ ol dahi ikrâr u i‘tirâf etmeğin alâ-mûcibi ikrârihi bedel-i sulh-ı merkūm yedi yüz guruşun müdde‘î-i mezbûr Hüseyin Beşe’ye edâsıyla merkūm Mustafa Hoca ilzâm olunduğu tescîl ve mübâşirleri baş ağa çavuşlarından İzmirli Ahmed Çavuş kulları yediyle huzûr-ı âlîlerine i‘lâm olundu. Fî 24 C sene [1]221.