Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 226 Hüküm no: 303 Orijinal metin no: [28b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandıkçı şakirdi Mehmed Memiş’in sağ kolunun kırılmasına sebep olan helvacı şakirdi Osman ile on yedi guruşa sulh olduğu Sandıkçı şâkirdlerinde olup on beş yaşında olduğunu ve bülûğunu mukırr u mu‘terif olan Mehmed Memiş b. Ahmed nâm kimesne Galata Bâb Mahkemesi’nde meclis-i şer‘de Helvacı şâkirdlerinden bülûğunu kezâlik mukırr u mu‘terif olan Osman b. Mehmed nâm kimesne muvâcehesinde mezbûr Mehmed Memiş’in vâlidesi Fâtıma Hatun hâzıra olduğu hâlde mezbûr Osman târih-i i‘lâmdan yedi gün mukaddem Galata’da sandıkçı dükkânı önünde sûkda beni kakıverip sağ kolum şikest olmağla mûcib-i şer‘îsini taleb ederim deyü tasaddî eylediğim da‘vâmdan bâ-vesâtet-i muslihîn mezbûr Osman ile on yedi guruş bedel-i makbûza ba‘de’s-sulh ve’l-kabûl husûs-ı mezkûra ve mâ-yahdesü minhe ve bedel-i sulh-ı mezkûra müte‘allika da‘vâdan herbirimiz âharın zimmetini ibrâ ve iskāt ve herbirimiz ber-vech-i muharrer âharın ibrâsını kabûl eyledik deyü ikrâr ve tasdîkleri tescîl ve bi’[l]-iltimâs huzûr-ı âlîlerine i‘lâm olundu. Fî 11 C sene [1]221.