Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 74 Hüküm no: 42 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mustafa Beşe’nin vârislerinin, vasiyetten sonra kalan parayı aldıkları Vilâyet-i Anadolu’da İnebolu Bursa kazâsına tâbi‘ İsaviran nâm karye sâkinelerinden Kerime ve Mü’mine bintey Hasan Dede nâm hatunlardan husûs-ı âti’z-zikre vekîl olup vekâleti hasm-ı câhid-i şer‘î mahzarında bi’l-fi‘il kazâ-i mezbûrda kādı olan Şeyh Mehmed Efendi b. Ahmed kıbelinden vârid olan nakl-i mu‘teber-i mer‘î ile sâbit olan Mustafa b. Pîrce nâm kimesne mahfil-i kazâda müvekkiletân-ı mezbûretânın li-ebeveyn karındaşları olup bundan akdem Mazarak? cezîresinde fevt olan Mustafa Beşe nâm râcilin muhallefâtına vaz‘-ı yed eden işbu bâ‘isü’l-kitâb el-Hâc Hüseyin Ağa b. el-Hâc Hasan mahzarında ikrâr ve takrîr-i kelâm edip müteveffâ-i mezbûrun muhallefâtından mezbûr el-Hâc Hüseyin Ağa’nın makbûzu olan yirmi yedi bin dokuz yüz yedi akçeyi vekâletim hasebiyle taleb eylediğimde mezbûr el-Hâc Hüseyin Ağa fi’l-hakīka müteveffâ-i mezbûrun yirmi yedi bin dokuz [yüz] yedi akçe muhallefâtı olup lâkin meblağ-ı mezbûrdan dört bin beş yüz akçe techîz ve tekfînine sarf edip ve ma‘rifet-i hâkim ile sülüs-i mâlından vasiyetini tenfîz edip ancak yedimde on altı bin akçe kaldı deyü bana cevâba tasaddî olup vech-i muharrer üzere ma‘mûlün-bih defter ibrâz edip ziyâde makbûzu olmadığına meclis-i şer‘de benim talebim ile yemîn bi’llâhi te‘âlâ eylemişdi. Binâen-aleyh ben dahi mezbûr el-Hâc Hüseyin Ağa’dan mârru’z--zikr on altı bin akçeden gayrı da‘vâ ve talebim ve nizâ‘ ve husûmetim kalmadı dedikde gıbbe’t-tasdîkı’l-mu‘teber mâ-vaka‘a ketb olundu. Fi’t-târîhi’l-mezbûr. Şuhûdü’l-hâl: Hasan Çelebi Kethüdâ-yı kerestehâne, Mehmed Efendi el-Müderris, Mehmed Efendi el-müezzin, İshakzâde Mehmed Ağa b. Mustafa, Mübâşir Mumcu Ali Bey b. Mustafa, el-Hâc Mehmed b. Abdullah.