Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 229 Hüküm no: 307 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber İbrahim Beşe’nin eşya bedelinden boşandığı karısı Ümmügülsüm Hatun’dan yirmi guruş alacağı olduğu Galata hâricinde Sarı Lütfü Mahallesi’nde sâkin Berber İbrahim Beşe b. Abdülbaki nâm kimesne Galata Bâb Mahkemesi’nde meclis-i şer‘de zevce-i mutallakası mu‘arrefetü’z-zât Ümmügülsüm bt. Halil nâm hatun muvâcehesinde mezbûre Ümmügülsüm Hatun yedimde emvâlim olan bir nişan yağlığı ve bir duhân kîsesi ve bir akçe kîsesini bi-gayr-ı hakkın ahz ve âhara yirmi guruş semen-i makbûza bey‘le istihlâk edip ben dahi bey‘-i mezkûru mücîz olmamamla semen-i mezkûru mezbûreden taleb ederim deyü da‘vâ eylediğimde ol dahi cevâbında ikrâr lâkin meblağ-ı mezkûr yirmi guruş kendiye edâ ve teslîm etmişidim deyü eylediği def‘ine ikāmet-i beyyine edemeyip bi’t-taleb müdde‘î-i mersûm İbrahim Beşe ba‘de’t-tahlîfü’ş-şer‘î mûcebince meblağ-ı mezkûr yirmi guruşun müdde‘î-i mezbûr İbrahim Beşe’ye edâsıyla mezbûre Ümmügülsüm Hatun ilzâm olunduğu bi’[l]-iltimâs huzûr-ı âlîlerine i‘lâm olundu. Fî 14 C sene [1]221.