Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 228 Hüküm no: 306 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oseb v. Kerpiççi Serkiz’in babasının terekesiyle alakalı olarak kardeşi Karabet ile iki yüz elli guruşa sulh olup yirmi beş ayda taksitle kendisine ödemesine izin verdiği Galata hâricinde Beyoğlu mütemekkinlerinden iken bundan akdem hâlik olan Kerpiççi Serkiz v. Kiragos zimmînin verâseti zevcesi Elmas Nasrâniye ile sulbî kebîr oğulları Oseb ve Karabet zimmîlere inhisârı tahakkukundan sonra derûn-ı arzuhâlde mersûmü’l-ism Oseb zimmî tarafından husûs-ı âtîde vekâleti Abdullah Çavuş b. İbrahim ile David v. Bağdısar zimmî şehâdetleriyle zâhir olan Agop v. Serope zimmî Galata Bâb Mahkemesi’nde meclis-i şer‘-i kavîmde müvekkil-i mersûmun er karındaşı sâhib-i arzuhâl mersûm Karabet zimmî muvâcehesinde mersûm Karabet zimmî hâlik-i mersûmun hîn-i helâkinde terekesi tahrîr ve taksîm olunduğu esnâda terekeden yedi yüz guruş kıymetli iki re’s bârgir ve ma‘lûmü’l-aded kerpiç ve eşyâ-yı sâiresini bi-gayr-ı hak ahz ve ketm ve ihfâ etmekle hisse-i irsiyyemi bi’l-vekâle taleb ederim deyü tasaddî eylediğim da‘vâmdan bâ-tavassut-ı muslihîn mersûm Karabet zimmî ile iki yüz elli guruşa bi’l-vekâle ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ hâlik-i mersûmun ism-i mâl ıtlâk olunur bi’l-cümle terekesine ve işbu târih-i i‘lâma gelince beynlerinde cereyân eden ahz u i‘tâ ve mu‘âmelât-ı şettâ ve hukūk-ı sâire-i şer‘iyyeye müte‘allika da‘vâdan mersûm Karabet zimmînin zimmetini bi’l-vekâle kabûlü hâvî ba‘de’l-ibrâ mersûm Karabet zimmî dahi kezâlik terekeye ve târih-i i‘lâma gelince beynlerinde cârî ahz u i‘tâ ve mu‘âmelât-ı şettâ ve hukūk-ı şer‘iyyeye müte‘allika da‘vâdan müvekkil-i mersûm Oseb zimmînin zimmetini bi’l-asâle kabûlü hâvî ba‘de’l-ibrâ bedel-i sulh-ı merkūmu beher şehr onar guruşdan yirmi beş ay tamamına dek edâ ve îfâ etmek üzere mersûm Karabet zimmîyi bi’l-vekâle te’cîl ve taksît eylediğimde ol dahi müeccelen ve mukassatan edâya ta‘ahhüd eyledi deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 14 C sene [1]221.