Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 231 Hüküm no: 311 Orijinal metin no: [29b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed’in bir miktar parası ile bazı eşyalarını haksızca aldığı iddiasıyla boşandığı kocası Debbağ Hacı İbrahim Ağa aleyhine açtığı davada iddiasını ispat edemediği Galata’ya muzâfe kasaba-i Kasımpaşa’da Çatma Mescid Mahallesi’nde sâkine mu‘arrefetü’z-zât Emine bt. Mehmed nâm hatun Galata Bâb Mahkemesi’nde meclis-i şer‘-i kavîmde zevc-i muhâlı‘ı Debbâğ el-Hâc İbrahim Ağa b. el-Hâc Mehmed nâm kimesne muvâcehesinde mezbûr el-Hâc İbrahim Ağa zevcim iken mahalle-i mezbûrede vâki‘ sâkine olduğumuz menzil derûnunda mukaffel tahta sandığımı kırıp derûnunda mevzû‘ emvâlim olan nakden on dört guruş ve mecmû‘u iki yüz guruş kıymetli bir zümrüd ve altın yüzük ve bir sincab kürk ve müsta‘mel gezîye kaplı bir nâfe kürk ve biri penbe biri kırmızı hilâlî iki gömlek ve dört uçkur ve üç çevre ve bir sarık örtüsü ve bir iş makramesi ve bir basma silecek ve bir peştamâl ve bir sahan ve bir çulumu bi-gayr-ı hakkın ahz etmekle mevcûde ise aynılarını müstehlek ise ba‘de’s-sübût kıymet-i şer‘iyyelerine mezbûr el-Hâc İbrahim Ağa’dan tazmîn taleb ederim deyü da‘vâ ettikde ol dahi cevâbında husûs-ı mezkûru külliyyen ba‘de’l-inkâr müdde‘iye-i mezbûre Emine Hatun ber-vech-i muharrer müdde‘âsına ikāmet-i beyyine edemeyip bi’t-taleb mezbûr el-Hâc İbrahim Ağa ba‘de’t-tahlîfü’ş-şer‘î mûcebince müdde‘iye-i mezbûre Emine Hatun da‘vâ-yı mezkûresiyle mezbûr el-Hâc İbrahim Ağa’ya bilâ-beyyine mu‘ârazadan men‘ olunduğu bi’[l]-iltimâs. Fî 10 C sene [1]221.