Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 230 Hüküm no: 310 Orijinal metin no: [29b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boduroğlu Mardros ve ortağı Yani’nin sırf zarar verme kasdıyla kiracısı bulundukları Mustafa Usta ve kız kardeşi Hadice aleyhine açtıkları anlaşılan davanın reddine karar verildiği Mübârek rikāb-ı kamer-tâb-ı müstetâb-ı hüsrevânîye arzuhâl eden Boduroğlu Mardros v. Mıgırdıç ve şerîki Yani v. Tanaş zimmîler Çarşamba günü dîvân-ı ma‘delet-unvânda ba‘dehû mahrûse-i Galata Mahkemesi’nde ma‘kūd meclis-i şer‘-i münîrde derûn-ı arzuhâlde isimleri mezkûr Mustafa Usta ve Hadice Hatun evlâd-ı el-Hâc Ahmed nâm li-ebeveyn karındaşlar taraflarından husûs-ı âtîde vekîl olduğu zât-ı mezbûreyi bi’l-mu‘arrefeti’ş-şer‘iyye ârifân Mehmed Ağa b. İsmail ve Halil Beşe ibney Hasan şehâdetleriyle sâbit olan Top Ustası Ahmed Usta b. Mehmed muvâcehesinde biz bundan akdem müvekkilân-ı mezbûrân Mustafa Usta ve Hadice Hatun’un mutasarrıf oldukları mahrûse-i mezbûre hısnı ebvâbından Küçükkule Kapısı hâricinde vâki‘ sobacı dükkânında beher şehr icâre-i ma‘lûme ile müşâhereten müsteciri iken bi-şartü’r-rücû‘ mutasarrıfân-ı müvekkilân-ı mezbûrândan taleb ederim deyü da‘vâ eylediklerinde vekîl-i mezbûr dahi cevâbında külliyyen inkâr etmekle müdde‘iyân-ı mesfûrân ber-vech-i muharrer müdde‘âlarını beyâna havâle olundukda lede’l-istimhâl ve’l-imhâl müddet-i mehl-i şer‘î bi’d-defa‘ât mürûr edip ber-vech-i muharrer <> ikāmet-i beyyineye kādir ve tahlîfe dahi tâlibler olmayıp husûs-ı mezkûrda ancak ızrâr dâ‘iyyesinde oldukları bir kıt‘a diğer i‘lâm-ı şer‘î mefhûmundan dahi müstebân olmağla mûcebince müdde‘iyân-ı zimmîyân-ı mersûmân Mardros ve Yani da‘vâ-yı mezkûreleriyle müvekkilân-ı mezbûrâna bilâ-beyyine-i âdile mu‘ârazadan men‘ olunduğu tescîl ve mübâşirleri Dîvân-ı âlî çavuşlarından Erzurumî Abdullah Çavuş kulları yediyle huzûr-ı âlîlerine i‘lâm olundu. Fî 14 C sene [1]221.