Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 232 Hüküm no: 313 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mellâh Anaştaş’ın kılavuzluk ücretinden alacağı olduğu iddiasıyla Sicilyateyn kaptanlarından Maryako aleyhine açtığı davada yüz yirmi guruşa sulh olduğu Mellâh Anaştaş v. Yani nâm zimmî Galata Bâb Mahkemesi’nde meclis-i şer‘de Sicilyateyn kapudanlarından Maryako v. Kanaki nâm müste’men kapudan muvâcehesinde Sicilyateyn tercümânlarından Şaber nâm tercümân hâzır olduğu hâlde ben kapudan-ı mersûmun râkib olduğu sefînede kulağuz olup Âsitâne-i aliyye’den Kırım’a ve ondan Âsitâne-i aliyye’ye gelinceye değin iki yüz elli guruş ücret tesmiye olunup ba‘dehû Kırım’a vardığımızda yevmî birer guruş ücret tesmiyesiyle beş ay kendiye hizmet ettiğimden sonra Âsitâne-i aliyye’ye gelip ba‘de edâ’i’l-hizmet meblağ-ı mezkûr iki yüz elli guruşu kapudan-ı mersûm yedinden ba‘de’l-ahz mârru’z--zikr Kırım’da kendiye yevmî birer guruş ücret tesmiyesiyle beş ay eylediğim hizmetimin ecr-i müsemmâsı olan cem‘an yüz elli guruşu Galata’da Havyar Hanı derûnunda mahzar-ı şuhûdda kapudan-ı merkūm ile yüz yirmi guruşa sulh olup mâ‘adâ otuz guruşa müte‘allika da‘vâdan kapudan-ı merkūmun zimmetini ibrâ edip bedel-i sulh-ı mezkûr kapudan-ı mersûmun zimmetinde kalmağla hâlâ taleb ederim deyü eylediği da‘vâsını lede’t-tezkiye şehâdetleri makbûle olan Yani v. Yorgi ve Yamandi v. Yani nâm zimmîler şehâdetleriyle kapudan-ı mersûm muvâcehesinde vech-i şer‘î üzere isbât etmeğin mûcebince bedel-i sulh-ı mezkûr yüz yirmi guruşu müdde‘î-i mesfûr Anaştaş zimmîye edâ ve teslîme kapudan-ı mersûma tenbîh olunduğu bi’[l]-iltimâs huzûr-ı âlîlerine i‘lâm olundu. Fî 15 C sene [1]221.