Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 232 Hüküm no: 314 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hediye bt. Mustafa’nın kendisine vurup bıçakla üzerine hücum ederek çocuğunu düşürmesine sebep olan Mustafa Hoca ile iki yüz elli guruşa sulh olduğu Galata’ya muzâfe Kasımpaşa’da Murâbıt Çeşmesi kurbünde sâkine ve zâtı Mustafa Ağa b. el-Hâc Süleyman ve Abdülvehhab Hoca b. Ali ta‘rîfleriyle mu‘arrefe Hediye bt. Mustafa nâm hatun Galata’da mahfil-i kazâda Tersâne-i âmire sayıcılarından Mustafa Hoca b. Mehmed Emin tarafından husûs-ı âti’z-zikri tasdîka vekîl olduğu mu‘arrifân-ı mezbûrân Mustafa Ağa ve Abdülvehhab Hoca şehâdetleriyle sâbit olan el-Hâc İbrahim Çavuş b. İsmail muvâcehesinde mezbûre Hediye Hatun’un zevci es-Seyyid Ahmed Çelebi b. es-Seyyid Ahmed b. Mustafa’nın li-ebeveyn er karındaşı ve tarafından husûs-ı âtîde ber-vech-i câ’î vekîl olduğu kezâlik şâhidân-ı mezbûrân şehâdetleriyle sâbit olan Enderûn ağalarından es-Seyyid Mustafa Ağa b. el-mezbûr es-Seyyid Ahmed hâzır olduğu hâlde takrîr-i kelâm edip müvekkil-i mezbûr Sayıcı Mustafa Hoca târih-i i‘lâmdan on bir gün mukaddem Çeşme-i merkūm önünde sûkda Yatağan bıçağı ile üzerime hücûm ve arkasıyla arkama darbedip batnımda mevcûde hamlim olmağla mezbûrun ber-vech-i meşrûh hücûm ve tehdîdinden nâşî alâmet-i sakat olmak üzere benden dem zuhûr etmekle mûcibini taleb ve da‘vâ ilkā-i cenîne tevkīf olunmuşidim el-hâletü hâzihî beynimizde muslihûn tavassut edip ben tasaddî eylediğim da‘vâ-yı mezkûremden müvekkil-i merkūm Sayıcı Mustafa Hoca ile an-inkâr 250 guruş bedel-i makbûza sulh olduğumda ol dahi sulh-ı merkūmu ba‘de’l-kabûl darb-ı merkūma ve haml-i mezbûre ve mâ-yahdesü minhe ve bi’l-cümle husûs-ı mezkûra müte‘allika âmme-i da‘vâmdan ben asâleten ve zevcim mezbûrun karındaşı hâzır-ı merkūm vekâleten merkūm Mustafa Hoca’nın zimmetini kabûlü hâvî ibrâ ve iskāt edip ba‘de’l-yevm müvekkil-i merkūm Mustafa Hoca ile husûs-ı mezkûra müte‘allika kat‘â da‘vâ ve husûmeti yokdur deyü mukırre-i mezbûrenin sâdır olan bi’l-cümle kelimât-ı meşrûhasını vekîl-i mezbûr el-Hâc İbrahim Çavuş ile hâzır-ı mezbûr es-Seyyid Mustafa Ağa’dan herbiri tasdîk edip bu vechile kat‘-ı münâza‘a eyledikleri tescîl ve bi’[l]-iltimâs huzûr-ı âlîlerine i‘lâm olundu. Fî 3 C sene [1]221.