Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 243 Hüküm no: 335 Orijinal metin no: [32a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenciye Fâtıma’nın boşandığı kocası Hamal Hacı Mehmed Beşe’den ikrarı üzere elli beş guruş alacağı olduğu Galata’ya muzâfe kasaba-i Fındıklı’da Pürtelaş Hasan Çelebi Mahallesi’nde sâkine mu‘arrefetü’z-zât Zenciye Fâtıma bt. Abdullah nâm hatun Galata Bâb Mahkemesi’nde meclis-i şer‘de zevc-i mutallıkı Hamal el-Hâc Mehmed Beşe b. Ömer nâm kimesne muvâcehesinde mezbûr el-Hâc Mehmed Beşe zevcim iken târih-i i‘lâmdan üç buçuk sene mukaddem beni tatlîk etmekle zimmetinde mütekarrir ve ma‘kūdun-aleyh otuz guruş mehr-i müeccelim ile cihet-i deyn-i şer‘îden alacağım olan kırk beş guruş ki cem‘an yetmiş beş guruş alacağım olmağla hâlâ taleb ederim deyü da‘vâ ettikde ol dahi cevâbında müdde‘iye-i mezbûre otuz guruş mehr-i müeccel tesmiyesiyle zevce-i medhûlün-bihâsı olduğunu ve târih-i mezkûrda tatlîkini ve cihet-i merkūmeden yirmi beş guruş deyni olduğunu ikrâr mâ‘adâ yirmi guruşu ba‘de’l-inkâr müdde‘iye-i mezbûre ziyâde yirmi guruş müdde‘âsını beyâna havâle olunup mezbûr el-Hâc Mehmed Beşe’nin ikrârıyla lâzım gelen meblağ-ı mezkûr elli beş guruşun müdde‘iye-i mezbûre Zenciye Fâtıma Hatun’a edâsıyla mezbûr el-Hâc Mehmed ilzâm olunduğu bi’l-iltimâs [huzûr-ı âlîlerine i‘lâm olundu.] Fî 26 C sene [1]221.