Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 244 Hüküm no: 338 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Rukiye Hatun’un karzdan Kalyoncu Seyyid Mustafa’dan yirmi guruş alacağı olduğu Galata’da Yolcuzâde Mahallesi’nde sâkine mu‘arrefetü’z-zât Şerife Rukiye bt. es-Seyyid Hasan nâm hatun Galata Bâb Mahkemesi’nde meclis-i şer‘de Kalyoncu [es-Seyyid Mustafa b.] es-Seyyid el-Hâc Ahmed nâm kimesne muvâcehesinde mezbûr es-Seyyid Mustafa zimmetinde bâ-temessük cihet-i karzdan yüz on iki buçuk guruşdan bâkī yirmi guruş alacak hakkım olmağla hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin meblağ-ı bâkī-i merkūm yirmi guruşu dahi müdde‘iye-i mezbûre Şerife Rukiye Hatun’a tamamen edâ ve teslîm etmişidim deyü eylediği def‘ine ikāmet-i beyyineden izhâr-ı acz edip tahlîfe dahi tâlib olmayıp mezbûr es-Seyyid Mustafa’nın ikrârı mûcebince lâzım gelen meblağ-ı bâkī-i mezkûr yirmi guruşu müdde‘iye-i mezbûre Şerife Rukiye Hatun’a edâsıyla es-Seyyid Mustafa’ya tenbîh olunduğu bi’[l]-iltimâs huzûr-ı âlîlerine i‘lâm olundu. Fî 26 C sene [1]221.