Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 840 Hüküm no: 1096 Orijinal metin no: [132a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Bayezid Beşe b. Abdülmennân’ın, câriyesi Mülâyim’i âzat ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi dergâh-ı âlî -dâme merci‘an li’l-e‘âlî- yeniçerilerinin dördüncü cemâ‘ati yoldaşlarına mahsûs odanın sâbıkan odabaşısı olup Dârü’l-hilâfeti’l-aliyye Kostantıniyye el-mahmiyye mahallâtından Harrât Kemal mahallesi sâkinlerinden olan fahrü’l-akrân el-Hâc Bayezid Beşe b. Abdülmennân’ın menziline varıp zeyl-i rakīmde isimleri terkīm olan udûl-i müslimîn mahzarlarında akd-i meclis-i şer‘-i mübîn eyledikde mûmâ-ileyh el-Hâc Bayezid Beşe meclis-i ma‘kūd-ı mezbûrda ikrâr ve takrîr-i kelâm edip bana rıkkıyyet-i sâbıkasını mu‘terife olan açık kaşlı, kara elâ gözlü, uzun boylu, sol kulağının memesi yarık Macariyyetü’l-asl işbu bâ‘isetü’l-kitâb Mülâyim bt. Abdullah’ı târih-i kitâbdan beş sene mukaddem malımdan tahrîr ve i‘tâk ve zümre-i harâir-i asliyyâta ilhâk eylemiş idim, mevsûfe-i mezbûre Mülâyim târih-i mezkûrdan beri sâir harâir-i asliyyât gibi hürre olup mevâlî için sâbit olan hakk-ı velâdan gayrı üzerinde hak ve alâkam kalmamışdır dedikde vâki‘ü’l-hâl mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Bayram ile meclis-i şer‘-i hatîre gelip alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb ve imlâ olundu. Fi’l-yevmi’l-âşir min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-akrân Mehmed Çelebi b. Şaban, Ali Beşe b. Mehmed, Mustafa Ağa b. el-Hâc Ebûbekir Ağa, Terzi Bayram b. Mehmed, Mumcu Mehmed Ağa b. Şâkir 2. [bölü]k, Attâr Ömer Beşe b. Hasan 72. [bölü]k.