Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 249 Hüküm no: 347 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mariçe bt. İlya’nın haksız yere bir çift altın bileziğini aldığı iddiasıyla Anaştaş v. Kostantin aleyhine açtığı davada dört yüz elli guruşa sulh olduğu Şahsı mu‘arrefe Mariçe bt. İlya Galata’da mahfil-i kazâda arzuhâl eden Anaştaş v. Kostantin zimmî muvâcehesinde mersûm Anaştaş zimmî mâlımdan beş yüz otuz beş guruş kıymetli ma‘lûmü’l-vezn bir çift altın bileziğimi bi-gayr-ı hak ahz etmekle hâlâ taleb ederim deyü tasaddî eylediğim da‘vâmdan bâ-vesâtet-i muslihîn mersûm Anaştaş zimmî ile dört yüz elli guruşa sulh olduğumda ol dahi sulh-ı mezkûru kabûl edip ben zikrolunan bileziğe ve ziyâde kıymetine ve târih-i i‘lâma gelince beynimizde cereyân eden hukūk-ı sâire-i şer‘iyyeye müte‘allika âmme-i da‘vâdan mersûm Anaştaş zimmînin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm dört yüz elli guruş zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi bedel-i sulh-ı merkūm dört yüz elli guruşu müdde‘iye-i mersûme Mariçe Nasrâniye’ye edâsıyla mersûm Anaştaş zimmî ilzâm olunduğu mübâşirleri İsmail kulları yediyle huzûr-ı âlîlerine i‘lâm olundu. Fî 2 Receb sene [1]221.