Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 249 Hüküm no: 346 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hüseyin Çelebi’nin aldığı borç karşılığında rehin verdiği evini borcunu ödemesine rağmen iade etmek istemeyen Ali Efendi ile elli guruşa sulh olduğu es-Seyyid Hüseyin Çelebi b. İsmail Galata Bâb Mahkemesi’nde meclis-i şer‘de Ali Efendi b. Abdurrahman nâm kimesne muvâcehesinde ben bundan akdem mahrûse-i Galata’ya muzâfe kasaba-i Kasımpaşa’da Sinan Paşa Mahallesi’nde vâki‘ iki tarafdan mekteb-i şerîf ve bir tarafdan mekābir-i Müslimîn ve bir tarafdan tarîk-i âm ile mahdûd ve’l-müştemilât-ı ma‘lûmeyi hâvî bir bâb mülk menzilimi iki yüz yirmi guruş semen-i makbûza bi-tarîkı’l-istiğlâl bey‘ ve teslîm eylediğimde ben dahi ber-vech-i muharrer iştirâ ve tesellüm etmişidi el-hâletü hâzihî meblağ-ı merkūmu yedimden ahz-birle menzil-i mahdûd-ı merkūmu geri istirdâd da‘vâsına tasaddî eylediğimde ol dahi bey‘-i merkūm bâtten olmuş idi deyü beynimizde ba‘de vukū‘ı’l-münâza‘a ve bâ-vesâtet-i muslihîn tasaddî eylediğim da‘vâ-yı mezkûremden merkūm Ali Efendi ile elli guruş bedel-i makbûza sulh olduğumda ol dahi sulh-ı mezkûru ba‘de’l-kabûl menzil-i mahdûd-ı mezkûra ve bedel-i sulh-ı merkūma ve bu cümle husûs-ı mezkûra müte‘allika da‘vâdan herbirimiz âharın zimmetini ibrâ ve iskāt ve herbirimiz ber-vech-i muharrer âharın ibrâsını kabûl-birle kat‘-ı münâza‘a eyledik deyü ikrâr ve tasdîkleri tescîl ve bi’l-iltimâs huzûr-ı âlîlerine i‘lâm olundu. Fî 15 Cumâdelâhire sene 1221.