Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 841 Hüküm no: 1098 Orijinal metin no: [132a-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. Halil Ağa’nın câriyesi Belkıs’ı âzat ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail dergâh-ı âlî -dâme merci‘an li’l-e‘âlî- yeniçerilerinin dördüncü cemâ‘ati yoldaşlarına mahsûs odanın sâbıkan odabaşısı olan fahrü’l-akrân el-Hâc Bayezid Beşe b. Abdülmennân’ın mahmiye-i İstanbul’da Harrât Kemal mahallesinde sâkin olduğu menziline varıp zeyl-i kitâbda isimleri terkīm olan müslimîn mahzarlarında akd-i meclis-i şer‘-i mübîn ettikde mûmâ-ileyh el-Hâc Bayezid Beşe’nin zevce-i menkûhası Emetullah bt. Halil Ağa’nın mehâriminden zimmetinde olup husûs-ı câi’z-zikre tarafından vekîl olduğu zâtını ma‘rifet-i şer‘iyye ile ârifân zevc-i mezbûr el-Hâc Bayezid Beşe ve mahalle-i mezbûre sâkinlerinden Terzi Bayram Beşe b. Mehmed şehâdetleriyle şer‘an sâbit olan fahrü’l-akrân ve’l-ekfâ Mustafa Ağa b. el-Hâc Ebûbekir Ağa meclis-i ma‘kūd-ı mezbûrda ikrâr ve takrîr-i kelâm edip müvekkile-i mezbûre Emetullah Hâtun kendiye rıkkıyyetini mu‘terife olan açık kaşlı, sarı elâ gözlü, uzun boylu, sağ kulağında samemi olan Rûsiyyetü’l-asl işbu bâ‘isetü’l-kitâb Belkıs bt. Abdullah nâm câriye-i memlûkesini hasbeten lillâhi te‘âlâ ve taleben li merzâti’r-Rabbi’l-a‘lâ tahrîr ve i‘tâk ve zümre-i harâir-i asliyyâta ilhâk eyledi ba‘de’l-yevm mevsûfe-i mezbûre Belkıs [132b] sâir harâir-i asliyyât gibi hürre olup müvekkile-i mezbûre Emetullah Hâtun’un mevâlî için sâbit olan hakk-ı velâ-i şer‘îden gayrı mevsûfe-i mezbûre Belkıs üzerinde hak ve alâkası kalmadı dedikde vâki‘ü’l-hâli mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Bayram ile meclis-i şer‘-i hatîre gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Es-Sâbikūn.