Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 842 Hüküm no: 1099 Orijinal metin no: [132b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Yakub’un, evini Şivekâr Sultan Vakfı’na istiğlâl yoluyla sattığı Mahmiye-i İstanbul’da Mirahor mahallesinde sâkin Mehmed Çelebi b. Yakub meclis-i şer‘-i hatîr-i lâzımü’t-tevkīrde umdetü’l-muhadderât tâcü’l-mestûrât Şivekâr Sultan vakfı olan nukūda bi’l-fi‘l mütevellî olan bâ‘isü’l-kitâb el-Hâc Mehmed Ağa b. Mehmed mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Ömer Çelebi b. Lütfullah mülkü ve bir tarafdan imâma meşrûta vakıf menzil ve iki tarafdan tarîk-i âm ile mahdûd dâhilen ve hâricen büyût-ı adîde ve su kuyusu ve zât-ı eşcâr-ı müsmire ve gayr-ı müsmire hadîkayı müştemil mülk menzilimi cümle hukūk ve merâfıkı ile mütevellî-i mezkûra üç yüz esedî guruşa bi tarîki’l-istiğlâl bey‘ ve teslîm ol dahi yedinde olan mâl-ı vakf-ı mezbûr ile vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr üç yüz esedî guruşu mütevellî-i mezkûr el-Hâc Mehmed yedinden tamâmen ahz u kabz edip yine menzil-i mahdûd-ı mezbûru mütevellî-i mezkûr Hacı Mehmed Ağa târih-i kitâbdan üç yüz altmış gün tamâmına değin ba‘de’t-tahliyyeti’ş-şer‘iyye ve’t-tekābuzi’l-mer‘î otuz yedi buçuk esedî guruşa bana îcâr ve teslîm ben dahi vech-i muharrer üzre istîcâr ve tesellüm ve kabûl eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâlis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Şaban Ağa b. Süleyman, Kenan Bey b. Abdullah, Sâlih Çelebi b. Mustafa, Hacı Ömer b. Mehmed.